«UGLEWODOROD SERIŞDELERINI GAZYP ALMAGYŇ EKOLOGIK USULLARY» ATLY HALKARA YLMY-AMALY MASLAHAT GEÇIRILDI
2023-nji ýylyň 15-nji iýunynda Ýagşygeldi Kakaýew adyndaky Halkara nebit we gaz uniwersitetinde «Uglewodorod serişdelerini gazyp almagyň Ekologik usullary» atly halkara ylmy-amaly maslahat geçirildi. Maslahata ýurdumyzyň ýokary okuw mekdepleriniň ýolbaşçylary we iri korporasiýalaryň wekilleri gatnaşdylar. Şeýle-de, onlaýn wideoaragatnaşyk arkaly Türkmenistanyň Daşary işler ministrliginiň Halkara gatnaşyklary institutynyň professor-mugallymlary, talyp ýaşlary gatnaşdylar.
Ylmy-amaly maslahat umumy mejlisden we 3 sany bölümçedäki mejlislerden ybarat boldy. Umumy mejlisi «Energetiki nukdaýnazarlar we uglewodorod ýataklaryny özleşdirmegiň täze tehnologiýalary» atly tema bilen Birleşen Milletler Guramasynyň Türkmenistandaky hemişelik utgaşdyryjysy Dmitriý Şlapaçenko alyp bardy. Ylmy-amaly maslahatyň birinji bölümçedäki mejlisi “Täze tehnologiýalar we energiýa geçiş: geljege garaýyş”, ikinji bölümçedäki mejlisi “Uglewodorod serişdelerini öndürmekde zyňyndylary azaltmak we monetizasiýa”, üçünji bölümçedäki mejlisi “Arassa energiýa taslamalaryny ilerletmekde daşky gurşaw maliýeleşdirmesiniň we başlangyçlaryň täze mümkinçilikleri” diýlip atlandyryldy.
Maslahatda çykyş edenler ýurdumyzyň dünýä ýurtlary bilen energetika hyzmatdaşlygy dogrusynda belläp geçdiler. Çykyşlarda tebigy baýlyklara baý bolan Türkmenistanyň dünýäniň energetiki bazarynda eýeleýän orny barada aýratyn nygtap geçildi.
Güljan ORAZNEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.