Türkmenistanyň wekiliýetiniň Tbilisi şäherine üstünlikli sapary: Magtymguly Pyragynyň otagynyň açylyşy we medeni gatnaşyklaryň pugtalandyrylmagy
2024-nji ýylyň 10-14-nji sentýabry aýynda ikitaraplaýyn medeni we bilim başlangyçlaryny has-da giňeltmek boýunça Türkmenistanyň resmi wekiliýeti Gruziýanyň paýtagty Tbilisi şäherinde iş saparynda boldular. Saparyň esasy maksady ikitaraplaýyn hyzmatdaşlygy has-da giňeltmegiň çäklerinde Suhumi döwlet uniwersitetinde türkmen halkynyň beýik şahyry we akyldary Magtymguly Pyraga bagyşlanan ýöriteleşdirilen otagyň dabaraly açylyşyna gatnaşmakdan ybaratdyr. Bu waka iki ýurduň arasyndaky medeniýetara dialogy we ylmy-akademiki gatnaşyklaryň pugtalanmagynda möhüm ädim boldy.
Saparyň dowamynda Magtymguly Pyragynyň goşgularynyň gruzin diline terjime edilen kitabynyň tanyşdyrylyşy boldy. Bu bolsa gruzin okyjylarynyň türkmen halkynyň ruhy mirasyna has çuňňur düşünmegine we ony öwrenmegine itergi berer. Magtymgulynyň eserleriniň gruzin diline terjime edilmegi medeni diplomatiýanyň ilerledilýändiginiň aýdyň beýany bolup, munuň özi beýik şahyrymyzyň dünýä medeniýetindäki ornunyň uludygyny görkezýär.
Bu çäreleriň guramaçylyk geçirilmeginde Türkmenistanyň Gruziýadaky ilçihanasynyň orny aýratyn uludyr. Ýurdumyzyň medeniýet we sungat işgärlerinden, ýokary okuw mekdepleriniň mugallymlaryndan ybarat bolan toparymyzy ýokary myhmansöýerlik bilen garşyladylar. Türkmenistanyň Gruziýadaky Adatdan daşary we Doly ygtyýarly ilçisi medeni diplomatiýanyň halklaryň arasyndaky gatnaşyklaryň ösmeginde we bilim ulgamynda hyzmatdaşlygyň çuňlaşmagynda möhüm gural bolup durýandygyny aýratyn belledi.
Saparyň maksatnamasynyň çäklerinde türkmen artistleri milli aýdym-saz we edebi däplerimizi gruzin tomaşaçylaryna görkezdiler. Medeni çykyşlar gruzin tomaşaçylarynda uly gyzyklanma döretdi. Bu çäre diňe bir türkmen halkynyň asyrlarboýy dowam edip gelýän medeni däplerini görkezmän, eýsem, ylym-bilim we medeni hyzmatdaşlygy ösdürmek üçin özboluşly platforma bolup hyzmat etdi.
Magtymguly Pyragynyň üç asyr mundan ozal wesýet eden agzybirlik, dostluk, hoşniýetlilik ýörelgelerine esaslanyp, bu günki gün Türkmenistan dünýä döwletleri bilen ikitaraplaýyn gatnaşyklary täze derejelere çykarmaga aýratyn gyzyklanma bildirýär. Binýady barha berkidilýän medeni köprüler bolsa iki doganlyk halky birek-birege has-da ýakynlaşdyrýar. Medeni diplomatiýanyň ösdürilmegine aýratyn ähmiýet berýän türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza alkyş sözlerimizi aýdýarys.
Annamyrat JUMAÝEW,
Türkmenistanyň Daşary işler ministrliginiň
Halkara gatnaşyklary institutynyň
Sanly ulgamlar we kommunikasiýa
bölüminiň esasy hünärmeni.