Türkmenistanyň Bitaraplyk syýasatynyň esasy ýörelgeleri we ýetilen sepgitler boýunça webinar okuw sapagy
2025-nji ýylyň 19-njy martynda Türkmenistanyň Daşary işler ministrliginiň Halkara gatnaşyklary institutynda “Türkmenistanyň Bitaraplyk syýasatynyň esasy ýörelgeleri we ýetilen sepgitler” atly tema boýunça webinar okuw sapagy geçirildi. Bu webinar okuw sapagyny institutyň Halkara gatnaşyklary we diplomatiýa kafedrasynyň professory, sosiologiýa ylymlarynyň doktory Öwezdurdy Berdiýewiç Muhammetberdiýew alyp bardy.
Webinara sanly ulgam arkaly ýokary okuw mekdepleriniň talyp ýaşlary we mugallymlary gatnaşdylar. Halypa mugallym öz çykyşynda Türkmenistan ýurdumyzyň halkara gatnaşyklarynda alyp barýan hemişelik Bitaraplyk syýasaty we onuň taryhy kökleri, häzirki wagtdaky ýetilen sepgitler boýunça giňişleýin gürrüň berdi.
Bitaraplyk türkmen döwletiniň Ýer ýüzünde parahatçylyk dörediji merkez hökmündäki ýokary derejä eýe bolmagyna uly goldaw berdi. Hormatly Prezidentimiziň taýsyz tagallalary netijesinde, türkmen döwletiniň işjeň ýagdaýda ýöredýän daşary syýasatdaky ugry tutuş adamzat tarapyndan oňlanylýar. Parahatçylygyň, ylalaşygyň we halklaryň arasyndaky dostlugyň hakyky merkezine öwrülen Aşgabatda Birleşen Milletler Guramasy we beýleki ençeme abraýly halkara guramalar bilen bilelikde uly forumlaryň we wajyp ähmiýeti duşuşyklaryň geçirilmegi munuň aýdyň subutnamasydyr.
Okuw sapagynyň soňunda talyp ýaşlar özleriniň gyzyklanýan soraglaryny berdiler. Sapak örän täsirli geçip, talyplarda goşmaça maglumatlary almaga mümkinçilik döretdi.
Aýgözel AMANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.