Türkmen-wenger gepleşikleriniň jemlerine bagyşlanan hoşallyk maslahat
2023-nji ýylyň 10-njy iýunynda Türkmenistanyň Daşary işler ministrliginiň Halkara gatnaşyklary institutynda Wengriýanyň Premýer-ministri Wiktor Orbanyň Türkmenistana amala aşyran resmi saparynyň jemlerine bagyşlanan hoşallyk maslahaty geçirildi. Oňa ýokary okuw mekdebiň mugallymlary hem-de talyp ýaşlary gatnaşdylar.
Maslahatda çykyş edenler ýokary derejede geçirilen türkmen-wenger gepleşikleriniň netijeleri boýunça gürrüň etdiler. Hormatly Prezidentimiz Serdar Berdimuhamedowyň belleýşi ýaly, döwletimiz Türkmenistan bilen Wengriýanyň arasynda 1992-nji ýylyň 11-nji maýynda ýola goýlan dostlukly gatnaşyklara ýokary üns berýär. Munuň şeýledigine Aşgabatda geçirilen türkmen-wenger gepleşikleri hem aýdyňlygy bilen şaýatlyk edýär.
Mälim bolşy ýaly, 2023-nji ýylyň 8-nji iýunynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyzda iki günlük resmi saparda bolan Wengriýanyň Premýer-ministri Wiktor Orban bilen duşuşyk geçirdi. Duşuşygyň dowamynda aýry-aýry möhüm ugurlara aýratyn üns berildi.
2023-nji ýylyň 9-njy iýunynda Aşgabatda hormatly Prezidentimiziň gatnaşmagynda ýokary derejede geçirilen türkmen-wenger gepleşikleriniň barşynda meseleleriň giň ugurlary ara alnyp maslahatlaşyldy. Gepleşikleriň jemleri boýunça gatnaşyklaryň dürli ugurlaryny öz içine alýan 8 sany resminama gol çekildi. Gol çekilen resminamalaryň hatarynda Türkmenistanyň Daşary işler ministrliginiň Halkara gatnaşyklary instituty bilen Wengriýanyň Daşary işler we söwda ministrliginiň Diplomatik akademiýasynyň arasynda diplomatik taýýarlyk ulgamynda hyzmatdaşlyk babatda özara düşünişmek hakynda Ähtnamanyň hem bolmagy aýratyn buýsandyryjydyr.
Çykyşlarda türkmen-wenger hyzmatdaşlygynda dürli ugurlarda tagallalary netijeli utgaşdyrmak üçin ägirt uly mümkinçilikleriň bardygy aýratyn bellenilip geçildi. Şu gezekki Aşgabatda geçirilen gepleşikleriň dowamynda gazanylan ylalaşyklar türkmen-wenger gatnaşyklarynda täze gözýetimleri açdy. Türkmen diplomatiýasynyň milli mekdebinde geçirilen hoşallyk maslahatynyň ahyrynda oňa gatnaşyjylar ýurdumyzyň halkara abraýyny belende göterýän türkmen halkynyň Milli Lideri — Gahryman Arkadagymyza, Arkadagly Serdarymyza alkyş sözlerini aýtdylar.
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.