Türkmen işewürleri halkara forumlara gatnaşdylar
2022-nji ýylyň 23-25-nji noýabry aralygynda Özbegistan Respublikasynyň Daşkent şäherinde oba hojalyk önümleriniň «UzAgroExpo» XVII halkara sergisi, azyk önümleriniň «UzProdExpo» XVII halkara sergisi hem-de «InterPackExpo» V halkara sergisi geçirildi. Bu forumlara özbek işewürleri bilen bir hatarda dünýäniň 20 döwletinden 160-dan gowrak kompaniýa öz eksponentleri bilen gatnaşdylar. Gatnaşyjylaryň arasynda Türkmenistanly işewürleriň hem bardygyny bellemek bolar. Halkara forumlar «International Expo Group» sergi kompaniýasy tarapyndan Özbegistanyň Oba hojalyk ministrliginiň hem-de Özbegistanyň azyk senagaty assosiasiýasynyň goldaw bermeginde guraldy.
«UzAgroExpo—2022» XVII halkara sergisi oba hojalygynyň tehnikasynyň, häzirki zaman oba hojalygynyň tehnologiýalarynyň, damja we ýagyş suwaryş ulgamlarynyň, ýyladyşhanalaryň, şeýle hem maldarçylyk, guşçylyk üçin ösen tehnologiýalaryň giň sergisini görkezýän halkara forumdyr. «UzProdExpo—2022» XVII halkara sergisi bolsa azyk önümlerini gaýtadan işleýän we sowadyjy enjamlary öndürijiler we üpjün edijiler üçin her ýylky görkeziş platformasydyr. Bu forumda azyk önümleri, içgiler we olary öndürmek üçin ulanylýan ingredientler aýratyn pudak tarapyndan görkezilýär. «InterPackExpo–2022» V halkara sergisinde bolsa islendik pikiri taýýar önüme öwürmäge kömek edip biljek tehnologiýalar we toplumlaýyn çözgütler görkezilýär.
Resul GYLYJOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
II ýyl talyby.