TÜRKMEN HALKYNYŇ MILLI LIDERI ARKADAG ŞÄHERINDE UMUMY BEÝAN BILEN ÇYKYŞ ETDI
Şu gün Bilimler we talyp ýaşlar güni mynasybetli Türkmenistanyň ilkinji «akylly» şäheri — Arkadag şäherinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Aba Annaýew adyndaky halkara atçylyk akademiýasy, Berdimuhamet Annaýew adyndaky mugallymçylyk orta hünär okuw mekdebi, Saçly Dursunowa adyndaky lukmançylyk orta hünär okuw mekdebiniň açylyş dabaralaryna gatnaşdy.
Şeýle hem şu gün Lebap welaýatynyň Türkmenabat şäherinde 5 müň orunlyk Seýitnazar Seýdi adyndaky Türkmen döwlet mugallymçylyk institutynyň binalar toplumynyň hem-de Türkmen döwlet binagärlik-gurluşyk institutynyň binalar toplumynyň düýbüni tutmak dabaralary geçirildi.
Soňra Arkadag şäheriniň Ruhyýet köşgünde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Bilimler we talyp ýaşlar güni hem-de 2023-2024-nji täze okuw ýylynyň başlanmagy mynasybetli umumy okuw sapagyny geçdi. Halk Maslahatynyň Başlygy ilki bilen, bu ýere ýygnananlary ýurduň jemgyýetçilik durmuşynda möhüm ähmiýete eýe bolan Bilimler we talyp ýaşlar güni hem-de täze okuw ýylynyň başlanmagy mynasybetli tüýs ýürekden gutlady.
Türkmen halkynyň Milli Lideri çykyşynda ýene-de sanlyja günlerden Türkmenistanyň Garaşsyzlygyna eýe bolanyna 32 ýylyň dolýandygyny, Garaşsyzlygyň we Bitaraplygyň türkmen halkynyň buýsanjydygyny hem aýratyn belledi.
Umumy okuw sapagynyň barşynda Türkmenistanda ähli ugurlarda şol sanda ykdysadyýetde, maliýe we energetika ulgamlarynda alnyp barylýan giň gerimli işler hem-de möhüm durmuş meseleleri barada bellenilip geçildi.
Türkmen halkynyň Milli Lideriniň ýaşlar bilen bu taryhy duşuşygynyň Arkadag Serdarly bagtyýar ýaşlar ýylynda, ýurtda giňden bellenilýän Bilimler we talyp ýaşlar gününde hem-de täze okuw ýylynyň başlanýan senesinde bolup geçmegi-de özboluşly sazlaşyga, aýratyn many-mazmuna eýedir.
Okuw sapagy çuňňur many-mazmuna eýe bolup, oňa gatnaşan bagtyýar türkmen ýaşlarynyň her biriniň kalbynda ýakymly täsirleri galdyrdy hem-de olaryň baýramçylyk şatlygyny, gowy okap, kämil hünärmen bolup ýetişmek, ýurduň ösüşlerine mynasyp goşant goşmak höwesini artdyrdy.
Çykyşynyň barşynda Gahryman Arkadagymyz ýaşlara watançylyk we edermenlik baradaky parasatly öwüt-nesihatlaryny berdi, şeýle hem terbiýäniň 12 görnüşiniň bardygyny aýratyn belläp geçdi.
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň çykyşy şowhunly el çarpyşmalar bilen garşylandy.
Ata-Watanymyzyň bedew bady bilen has-da öňe gitmeginde, biz ýaş nesliň geljekde ökde hünärmenler bolup ýetişmegimizde taýsyz tagallalary edýän Gahryman Arkadagymyzyň, Arkadagly Serdarymyzyň janlary sag, başlary dik, il-ýurt bähbitli, adamzat ähmiýetli işleri elmydama rowaçlyklara beslensin!
Mahym KAKAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň II ýyl talyby.