“Türkmen diplomatiýasynyň milli mekdebiniň üstünlikleri ” atly prezentasiýa bäsleşigi
2024-nji ýylyň 19-njy martynda Türkmenistanyň Daşary işler ministrliginiň Halkara gatnaşyklary institutynyň Halkara hukugy we deňeşdirme hukuk öwreniş kafedrasynyň gurnamagynda Türkmenistanyň Daşary işler ministrliginiň Halkara gatnaşyklary institutynyň döredilen güni mynasybetli “Türkmen diplomatiýasynyň milli mekdebiniň üstünlikleri” atly prezentasiýa bäsleşigi geçirildi. Bu bäsleşige Halkara hukugy fakultetiniň I we II ýyl talyp ýaşlary gatnaşdylar.
Talyplar institutyň döredilen gününden başlap, şu günki güne çenli döwürde institutyň gazanan üstünlikleri barada, şeýle hem medeni-ynsanperwer ulgamynda, halkara bäsleşiklerinde ýetilen sepgitler dogrusynda çykyş etdiler. Bäsleşigiň netijeleri boýunça emin agzalary ýeňiji bolan talyplara Halkara hukugy we deňeşdirme hukuk öwreniş kafedrasynyň “Ýaş hukukçylar” ylmy gurnagynyň adyndan ýadygärlik sowgatlaryny gowşurdylar.
Şeýle hem, bäsleşigiň dowamynda Halkara zähmet guramasynyň (MOT) Bütindünýä zähmeti goramak güni we Bütindünýä saglygy goraýyş guramasynyň (WOZ) Bütindünýä saglyk güni mynasybetli institutyň talyp ýaşlarynyň arasynda çykyşlar gurnaldy.
Şeýle bäsleşikleriň geçirilip durulmagy talyp ýaşlaryň bilimlerini artdyrmakda uly goşant bolar.
Nursähet JOMARTOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.