Türki medeniýetiniň halkara guramasyna (TÜRKSOÝ) agza döwletleriň ÝUNESKO-nyň işleri baradaky Milli toparlaryň 10-njy mejlisi
2024-nji ýylyň 16-njy maýynda Aşgabat şäheriniň «Arçabil» myhmanhanasynda Türki medeniýetiniň halkara guramasyna (TÜRKSOÝ) agza döwletleriň ÝUNESKO-nyň işleri baradaky Milli toparlaryň 10-njy mejlisiniň açylyş dabarasy geçirildi we TÜRKSOÝ-a agza döwletleriň ÝUNESKO-nyň çäklerinde hyzmatdaşlygy giňeltmek boýunça tejribe alyşmak arkaly umumy mejlis dowam etdirildi.
TÜRKSOÝ-a agza döwletleriň ÝUNESKO-nyň işleri baradaky Milli toparlaryň 10-njy mejlisi ÝUNESKO-nyň «Bütindünýä medeni we tebigy mirasy goramak baradaky Konwensiýasyny» amala aşyrmakda hyzmatdaşlyk etmek boýunça 8-nji seminar; ÝUNESKO-nyň «Maddy däl medeni mirasy gorap saklamak baradaky Konwensiýasyny» durmuşa geçirmekde hyzmatdaşlyk etmek boýunça 13-nji seminar; ÝUNESKO-nyň çäginde ylym-bilim ulgamynda hyzmatdaşlyk etmek boýunça 6-njy seminar; Türki medeniýetiň we mirasyň halkara gaznasynyň başlangyjy esasynda «Umumy Türki medeni mirasy boýunça Konwensiýasy ugrundaky hyzmatdaşlyk» atly seminar ýaly degişli bölümçelerde öz işlerini dowam etdiler.
ÝUNESKO-nyň çäginde ylym-bilim ulgamynda hyzmatdaşlyk etmek boýunça 6-njy seminar Türkmenistanyň Daşary işler ministrliginiň Halkara gatnaşyklary institutynda ekspertleriň gatnaşmagynda geçirildi. Mejlisde gelnen netijeler dogrusynda degişli jemleýji resminama kabul edildi.
Hormatly Prezidentimiziň edýän atalyk adalary bilen häzirki wagtda Türkmenistan döwletimiz dürli guramalaryň çäklerinde öz parahatsöýüjilikli syýasatyny ugur edinip, dürli başlangyçlar bilen çykyş edýär we olary durmuşa geçirýär, şeýle-de olaryň çäklerinde agza döwletler bilen dostlukly hyzmatdaşlygy alyp barýar. Halkara ähmiýetli çäre bolan, TÜRKSOÝ-a agza döwletleriň ÝUNESKO-nyň işleri baradaky Milli toparlaryň 10-njy mejlisiniň Türkmenistanda ýokary derejede geçirilmegi, onuň çäginde netijeli karara gelip, biragyzdan jemleýji resminamanyň kabul edilmegi hem muňa aýdyň subutnama bolup çykyş edýär.
Merdan BERDINIÝAZOW,
Türkmenistanyň Daşary işler ministrliginiň
Halakra gatnaşyklary institutynyň uly mugallymy.