“Telekeçiler mekdebi” öz badalgasyny aldy
Dünýäniň her bir ýurdy öz ykdysadyýetini ösdürmekde dürli işleri amala aşyrýar. Özbegistan Respublikasynda hem bu babatda ajaýyp taslamalar durmuşa geçirilýär. Olaryň biri hem 2021-nji ýylyň 21-nji dekabrynda dabaraly ýagdaýda Taşkent şäherinde “Uzmpromstroýbank” we “Uzsanoatkurilishmateriallari” birleşigi bilen bilelikde açylan “Telekeçiler mekdebi” atly okuw merkezidir.
Merkez telekeçilik guramalarynyň we işewür guramalarynyň üsti bilen gurluşyk materiallaryny öndürmek ugrunda hünärmenleri taýýarlamagy, şeýle hem olar üçin has giň mümkinçilikleri döretmegi maksat edinýär.
Merkezde dört modula bölünen häzirki zaman okuw meýilnamalary we täze okuw usullary esasynda sapaklar geçirilýär. Şu maksat bilen okuw merkezi zerur okuw desgalary we esbaplar bilen enjamlaşdyrylyp, onda ýeterlik edebiýat gaznasy döredildi. Merkezdäki okuw kurslary 72 sagatlyk maksatnama esasynda düzülip, ol bir wagtyň özünde 40 adamy okatmaga mümkinçilik berýär.
Okuw merkeziniň işiniň netijesinde, gurluşyk materiallaryny öndürmekde telekeçileriň hünär derejesi yzygiderli ýokarlandyrylar. Öňdebaryjy binagärlik we dizaýn ýörelgelerine esaslanýan “geljegiň materiallarynyň” gerimini hem giňelder we önümçilige halkara standartlaryny giňden ornaşdyrmaga ýardam berer. Şonuň bilen birlikde onuň tehnologiýalar äleminde ýokary derejeli hünärmenleri taýýarlamakda hyzmaty uly bolar.
Şeýle hem açylyş dabarasynda çykyş edenler “Telekeçiler mekdebiniň” gurluşyk materiallarynyň önümçilik pudagy üçin täze tehnologiýalar we innowasiýalar merkezine öwrüljekdigini bellediler.
Iki ýyl bäri işläp gelýän “Telekeçiler mekdebi” okuw işi goşa bilim maksatnamasy esasynda guralýar. Şoňa laýyklykda, okuw nazary leksiýalar, amaly gönükmeler, laboratoriýa we garaşsyz iş görnüşinde geçirilýär.
2022-nji ýylda geçirilen işleriň netijesinde merkezde işewür ýolbaşçylar, inženerler, aýry-aýry telekeçiler, doktorantlar we garaşsyz dalaşgärler ýokary okuw jaýlarynyň talyplary we ilatyň beýleki höwesjeňleri bilelikde jemi 484 sany bolup okadylar. Şol okuw sapaklarynyň netijesinde diňleýjileriň hemmesine şahadatnamalar gowşuryldy.
“Türkiýe gurluşyk materiallaryny öndürmekde iň ösen döwletleriň biridir. Türkiýäniň Maltepe uniwersitetiniň mugallym-professorlarynyň biziň okuw merkezimizde zähmet çekmekleri hem buýsandyryjy wakadyr. Netijede, kompaniýamyzyň häzirki önümçilik kuwwaty 10-15% ýokarlandy. Önümleri eksport etmek üçin daşary ýurtly hyzmatdaşlar bilen deslapky gepleşikler alnyp barlar” diýip Taşkent şäherindäki OOO Humo Stroymix Invest kompaniýasynyň inženeri Humaýun Jobibekow belleýär.
Mahym KAKAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
I ýyl talyby.
Çeşme: