TÄZE ÝYL BAÝRAMÇYLYGY ÝOKARY GURAMAÇYLYKLY GEÇIRMEK BOÝUNÇA WAGYZ-NESIHAT ÇÄRESI GEÇIRILDI
2024-nji ýylyň 29-njy noýabrynda Türkmenistanyň Daşary işler ministrliginiň Halkara gatnaşyklary institutynda türkmen diplomatiýasynyň milli mekdebiniň ilkinji Ýaşlar guramasy we ilkinji Zenanlar guramasynyň bilelikde guramagynda institutyň professor-mugallymlarynyň we talyp ýaşlarynyň gatnaşmagynda wagyz-nesihat çäresi geçirildi. Çäre, esasan, Täze ýyl baýramçylygyny ýokary guramaçylykly geçirmek boýunça ýaşlaryň arasynda terbiýeçilik işlerini güýçlendirmek, olaryň ýüze çykýan nogsanlyklardan daşda durmaklaryny gazanmak, hukuk bilimlerini artdyrmak, zyýanly endikleriň, şol sanda partlaýjy maddalaryň adamyň saglygyna ýetirýän zyýany baradaky sowatlylygyny ýokarlandyrmak, hukuk bozulmalarynyň öňüni almak, hem-de türkmeniň döwletlilik ýörelgelerini, milli däp-dessurlarymyzy giňden wagyz etmek maksady bilen geçirildi.
Wagyz-nesihat çäresiniň dowamynda Türkmenistanyň Magtymguly adyndaky Ýaşlar guramasynyň Aşgabat şäheriniň Berkararlyk etrap Geňeşiniň başlygy Ismail Ýakubow, Aşgabat şäheriniň Polisiýa müdirliginiň Ýangyn howpsuzlygy bölüminiň 103-nji harbylaşdyrylan ýangyn howpsuzlygy bölüminiň müdiriniň orunbasary Içerki gullugyň Kapitany Amangeldi Çolukow, Aşgabat şäheriniň Polisiýa müdirliginiň 4-nji bölüminiň uly gözegçisi Polisiýanyň maýory Meýlis Nurgeldiýew, Aşgabat şäheriniň Berkararlyk etrabynyň Arassaçylyk we keselleriň ýaýramagyna garşy göreşmek gullugynyň hünärmeni Selbi Berdimyradowa dagy çykyş etdiler.
Çykyşlaryň dowamynda ýurdumyzda ýaş nesilleriň ylymly-bilimli, giň dünýägaraýyşly kämil ynsanlar bolup ýetişmegi ugrunda uly mümkinçilikleriň döredilýändigi dogrusynda täsirli gürrüňler etdiler. Täze ýyl baýramçylygy bellenilýän günlerde talyplaryň köpçülik ýerlerinde özlerini tertipli alyp barmalydyklary, zyýanly endiklerden daşda durmalydyklary baradaky çykyşlar bolsa giň many-mazmuna eýe boldy.
Nurmuhammet ANNAMURADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.