TÄZE TEJRIBELERE BAGYŞLANAN DUŞUŞYK
2024-nji ýylyň 10-njy maýynda Türkmenistanyň Daşary işler ministrliginiň Halkara gatnaşyklary institutynda daşary ýurtlarda saparda bolan mugallymlaryň tejribelerini paýlaşmak maksady bilen, duşuşyk geçirildi. Duşuşyga institutyň professor-mugallymlary gatnaşdylar.
Hormatly Prezidentimiziň üstünlikli durmuşa geçirýän daşary syýasy strategiýasynda ylym-bilim ugurly gazanylýan ylalaşyklar, ýola goýulýan hyzmatdaşlyklar häzirki taryhy eýýamda hil taýdan täze derejelere çykýar. 2024-nji ýylyň 24-nji apreli — 6-njy maýy aralygynda türkmen wekiliýetiniň Amerikanyň Birleşen Ştatlarynyň «Open World» maksatnamasynyň çäklerinde ABŞ-nyň Waşington, Albukerki şäherlerine we Kaliforniýa ştatyna amala aşyran tanyşlyk sapary hem halkara ylym-bilim hyzmatdaşlygyny giňeltmekde, özara pikir we tejribe alyşmakda möhüm ähmiýete eýedir.
Ýeri gelende aýtsak, 2024-nji ýylyň 16-njy aprelinde Gazagystan Respublikasynyň Aktau şäherinde ýerleşýän Ýesenow uniwersitetinde beýik türkmen şahyry we akyldary Magtymguly Pyragynyň doglan gününiň 300 ýyllygyna bagyşlanyp, «Magtymgulynyň ruhy mirasy — dostlugyň we parahatçylygyň simwoly» atly halkara ylmy maslahat geçirildi. Bu maslahata hem institutymyzyň mugallymy gatnaşyp, Gündogaryň beýik akyldary Magtymguly Pyragynyň ömür we döredijilik ýolunyň dünýä edebiýatçylary tarapyndan çuňňur öwrenilýändigi, halkara edebiýat meýdanynda giňden wagyz edilýändigi dogrusynda çykyş etdi.
Duşuşygyň dowamynda mugallymlar oňa gatnaşyjylar bilen saparyň özlerinde galdyran täsirleri we gazanan tejribeleri barada pikir alyşdylar.
Oguloraz EÝEBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.