Täsirli geçen metbugat maslahaty
2023-nji ýylyň 29-njy sentýabrynda Türkmenistanyň Daşary işler ministrliginiň Halkara gatnaşyklary institutynda Magtymguly Pyragynyň doglan gününiň 300 ýyllygy mynasybetli Žurnalistikanyň nazaryýeti we amalyýeti kafedrasynyň şeýle hem Jemgyýeti öwreniş ylymlary kafedrasynyň bilelikde guramagynda «Magtymguly Pyragynyň edebi mirasynyň ylmy-filosofiki seljermesi» atly metbugat maslahaty geçirildi. Türkmen edebiýatynyň nusgawy şahyrynyň mirasyna bagyşlanan bu metbugat maslahatyna türkmen diplomatiýasynyň milli mekdebiniň halypa mugallymlary, bagtyýar talyp ýaşlary işjeň gatnaşdylar.
Beýik akyldaryň döredijiligi Berkarar döwletiň täze eýýamynyň Galkynyşy döwründe ýaş nesli terbiýelemekde edebi çeşme bolup durýar. Metbugat maslahatynda dana şahyrymyzyň ömri we döredijiligi, gymmatly mirasy dogrusynda täsirli çykyşlar edildi. Şahyryň köptaraplaýyn döredijiliginden eriş-argaç bolup geçýän watançylyk, il-ýurt, dost-doganlyk, wepalylyk, ynsan terbiýesi, halal hem arassa zähmet ýaly temalardaky şygyrlary çeper okaldy.
Çäräniň dowamynda talyplar özlerini gyzyklandyrýan temalar boýunça sorag-jogap alyşdylar.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.