TARYH BEÝIK IŞLER BILEN ÝAZYLÝAR
Milli Liderimiziň gatnaşmagynda Arkadagyň ak ýoly bilen Serhetabat — Hyrat gaz geçirijisiniň nobatdaky tapgyryna badalga bermek dabarasyndan soňky oýlanmalar
Halkymyzda gurmak, döretmek döwletlilik hasaplanýar. Diňe bir ýurt ähmiýetli däl, eýsem, parahatçylygy dörediji we abadançylygy pugtalandyrmaga ýardam berýän sebit möçberli ykdysady taslamalary durmuşa geçirmek ösen ykdysadyýetli ýurda mahsusdyr. Şu jähetden, 20-nji oktýabrda Gahryman Arkadagymyzyň Türkmenistan — Owganystan — Pakistan — Hindistan gaz geçiriji taslamasynyň Arkadagyň ak ýoly bilen Serhetabat — Hyrat gaz geçirijisiniň Owganystanyň çäginde alnyp barylýan gurluşyk işleriniň barşy bilen tanyşmagy, şeýle hem iri taslamanyň nobatdaky tapgyryna ak pata bermegi dünýä jemgyýetçiliginde giň seslenme döretdi. Şol bir wagtda bu waka ýurdumyzyň geoykdysady mümkinçilikleriniň umumadamzat bähbidine gönükdirilýändiginiň aýdyň beýanyna öwrüldi.
ASYRYŇ TASLAMASY
Häzirki wagtda Türkmenistan döwletimiz tebigy gazyň gorlary boýunça dünýäde dördünji orny eýelemek bilen, bu ugurda eksport mümkinçiliklerini artdyrmaga uly ähmiýet berýär. Ýurdumyzdaky «Galkynyş» käni bolsa gazyň möçberi boýunça dünýäde birinji orunda durýar. Munuň özi energiýa bilen sebitimizdäki we onuň çäklerinden daşardaky hyzmatdaşlaryň hem isleglerini kanagatlandyrmaga doly mümkinçiligiň bardygyny alamatlandyrýar. Şunda umumy uzynlygy 1 müň 821 kilometre barabar Türkmenistan — Owganystan — Pakistan — Hindistan gaz geçirijisi üçünji müňýyllygyň iň iri taslamalarynyň hataryndadyr. Ol türkmen gazyny dünýä boýunça ykdysadyýetiň ýokary derejede ösýän sebitleriniň birine — Günorta Aziýa akdyrmakda möhüm başlangyçdyr.
Transmilli taslamanyň durmuşa geçirilmegi sebitde energetika howpsuzlygyny üpjün etmäge, goňşy we sebit döwletleriniň halklarynyň abadançylygyna, olaryň gülläp ösmegine gönükdirilendir. Uzynlygy 153 kilometr bolan Arkadagyň ak ýoly bilen Serhetabat — Hyrat gaz geçirijisi hem bu taslamanyň möhüm bölegidir. Sebäbi ol iri taslamanyň goňşy ýurtdaky ilkinji tapgyrydyr. Gaz geçirijiniň uzynlygy 214 kilometre deň bolan türkmen böleginiň edermen gazçylarymyz tarapyndan üstünlikli durmuşa geçirilendigini bolsa buýsançly bellemelidiris.
Ýeri gelende, geçen ýylyň 11-nji sentýabrynda Mary welaýatynda Türkmenistan — Owganystan — Pakistan — Hindistan gaz geçiriji taslamasynyň wajyp tapgyry bolan Arkadagyň ak ýoly bilen Serhetabat — Hyrat gaz geçirijisiniň gurluşygyna badalga berlendigini nygtamak gerek. Mundan başga-da, şol gün Türkmenistan bilen Owganystanyň arasynda hoşniýetli hyzmatdaşlygyň barha rowaçlanýandygyny görkezýän täze desgalar ulanmaga berildi, möhüm ähmiýetli desgalaryň gurluşygyna badalga berildi.
«ÝAN GOŇŞYM — JAN GOŇŞYM»
Gahryman Arkadagymyz şu ýylyň martynda «Euronews» teleýaýlymyna beren interwýusynda Owganystan bilen ikitaraplaýyn gatnaşyklaryň häzirki ýagdaýy barada aýratyn durup geçdi. Şunda Milli Liderimiz: «Owgan halky — biziň goňşymyz. Biz bu halk bilen ýüzýyllyklaryň dowamynda ysnyşykly ýaşaýarys. Owganlaryň däp-dessurlary, ruhy we medeni gymmatlyklary bize has ýakyn. Türkmenler bilen owganlaryň uzak döwürlerden bäri dowam edip gelýän taryhy gatnaşyklary bar. Şoňa görä-de, Owganystanyň, ol ýerde ýaşaýan adamlaryň ykbaly biziň üçin parhsyz däldir» diýip bellemegi hoşniýetliligiň, dost-doganlygyň, ynsanperwerligiň, agzybirligiň özboluşly dabaralanmasyna öwrüldi.
Ajaýyp zamanamyzda Gahryman Arkadagymyzyň sahawat ýoly, parahatçylyk dörediji ýörelgeleri belent ykrar tapýar. Halkymyz bu ýol bilen öňe gidip, uly üstünliklere, beýik ösüşlere eýe bolýar. Ol ýol bu günki gün Arkadagly Gahryman Serdarymyz tarapyndan mynasyp dowam etdirilýär. Şunda hormatly Prezidentimiz tarapyndan transmilli taslamany durmuşa geçirmek üçin berk maddy-enjamlaýyn binýat döredildi. Taslamanyň gurluşygynyň 200-den gowrak täze, häzirki zaman kuwwatly tehnikalar bilen üpjün edilmegi munuň aýdyň güwäsidir.
Gahryman Arkadagymyz nobatdaky tapgyra badalga bermek mynasybetli dabaraly mejlisdäki çykyşynda: «Bu taslamanyň gurluşygyna owgan raýatlary hem işe çekiler. Şeýle hem bu taslamanyň doly durmuşa geçirilmegi bilen owgan halky üçin täze iş orunlary dörär. Her ýyl Owganystana ortaça 1 milliard amerikan dollaryndan gowrak serişdeler gelip gowşar» diýip belledi. Munuň özi dünýä hakyndaky aladanyň, ilkinji nobatda, özüň, goňşyň hakyndaky aladadan, adamzat hakyndaky aladanyň bolsa adam hakyndaky aladadan başlanýandygyny ýene bir ýola tassyklaýar.
BIR DÜNÝÄ — BIR YKBAL
Biziň ýaşaýan dünýämiz — adamzadyň umumy öýi. Diýmek, bitewi dünýämizde halklaryň hem ykbaly bir. Milli Liderimiz: «Halklar — bir jebis maşgala» diýip, bu hakykaty çeper söz bilen beýan edýär. Şunda haýyr işler bilen dünýä dahylly bolmak islendik döwletiňem, islendik halkyňam arzuwydyr. Bu babatda ata Watanymyzyň dünýä nusgalykdygy ykrar edilen hakykatdyr. Muňa iň ýakyn goňşymyz Owganystan bilen gatnaşyklarymyzyň mysalynda hem aýdyň göz ýetirýäris.
Türkmenistan owgan halkyna köp möçberde ynsanperwerlik kömegini berýär. Ýurdumyzda owgan talyplary okadylýar. Bu ýurtda öz serişdelerimiziň hasabyna durmuş maksatly desgalar gurulýar. Umuman, ata Watanymyz Türkmenistan Owganystanyň sebitde we onuň çäklerinden daşarda alnyp barylýan ykdysady işlere, taslamalary amala aşyrmaga goşulmagy ugrunda yzygiderli çykyş edýär. Türkmenistan — Owganystan — Pakistan — Hindistan gaz geçiriji taslamasy hem ösüş arkaly parahatçylygy gazanmakda, halklary jebisleşdirmekde, halkara gatnaşyklaryň we ykdysady hyzmatdaşlygyň täze arhitekturasyny kemala getirmekde möhüm ähmiýete eýedir.
Şu ýerde Amerikanyň Birleşen Ştatlarynyň Türkmenistan — Owganystan — Pakistan — Hindistan gaz geçiriji taslamasyny ilkinji bolup goldan döwletleriň biridigi hakda aýratyn durup geçmek isleýäris. Amerikanyň «Brownstein» kompaniýasy bolsa bu ägirt uly taslamany durmuşa geçirmekde öz gymmatly, peýdaly maslahatlaryny berýär. Şoňa görä-de, Gahryman Arkadagymyz taryhy çykyşynyň dowamynda bu iri taslamany goldaýandygy üçin Amerikanyň Birleşen Ştatlarynyň Prezidenti Donald Trampa tüýs ýürekden minnetdarlyk bildirdi.
* * *
Arkadagly Gahryman Serdarymyz «Ýaşlar — Watanyň daýanjy» atly kitabynda: «Taryh beýik işler bilen ýazylýar. Taryh halk üçin edilen, halk bilen bilelikde ýerine ýetirilen beýik amallar bilen ýazylýar» diýip belleýär. Elbetde, uly taryh pursatlardan düzülip, Milli Liderimiziň hem-de hormatly Prezidentimiziň tagallalary bilen Berkarar döwletiň täze eýýamynyň Galkynyşy döwründe türkmen topragynda täze taryh ýazylýar. Ýer ýüzünde parahatçylyk dörediji ýurt, Garaşsyz, hemişelik Bitarap döwlet hökmünde giňden tanalýan ata Watanymyz Türkmenistandan Gahryman Arkadagymyzyň ak ýoly, Arkadagly Gahryman Serdarymyzyň döwletli başlangyçlary bilen dünýä uzaýan dost-doganlyk köprüleri umumadamzat ähmiýetli işler bilen has-da berkidilýär.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň talyby, «Nesil».
Çeşme: «Nesil» gazeti, 25.10.2025 ý.
https://www.turkmenmetbugat.gov.tm/tk/newspapers/7/articles/213037