Tapawutlanan talyplar sylaglanyldy
2024-nji ýylyň 29-njy iýunynda Türkmenistanyň Daşary işler ministrliginiň Halkara gatnaşyklary institutynda göreldeli talyplary sylaglamak dabarasy geçirildi. Oňa institutyň talyplarydyr professor-mugallymlary gatnaşdylar.
Dabarada 2023-2024-nji okuw ýylynyň II ýarymýyllygynyň jemleri boýunça okuwda, tertip-düzgünde görelde görkezen hem-de halkara we döwlet derejesinde geçirilýän medeni-köpçülikleýin çärelerine işjeň gatnaşan, döredijilik we ylmy bäsleşiklerde ýokary netijeleri gazanan talyplaryň 40-a golaýy sylaglanyldy. Olara türkmen diplomatiýasynyň milli mekdebi tarapyndan Hormat hatlary we gymmatbahaly sowgatlar gowşuryldy.
Dabaranyň Arkadag şäheriniň açylmagynyň 1 ýyllygynyň bellenilýän gününde geçirilmegi aýratyn ähmiýete eýedir. Çünki Arkadag şäheri ýaşlaryň we ýaşlygyň, täzeçil döredijilik başlangyçlarynyň öz kämil beýanyny tapan «akylly» taslamasydyr. Şunuň bilen baglylykda, dabaranyň dowamynda institutyň rektory, taryh ylymlarynyň kandidaty Jumamyrat Gurbangeldiýew çykyş edip, sylaglanan talyplary gazanan üstünlikleri bilen gutlady. Şeýle-de Gahryman Arkadagymyz hem-de Arkadagly Gahryman Serdarymyz tarapyndan döredilýän mümkinçiliklerden ruhlanyp, mundan beýläk-de ýurdumyzyň ösüşlerine özleriniň mynasyp goşant goşmaklaryny arzuw etdi.
Jennet GYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.