Talyplaryň täsirli çykyşlary
2024-nji ýylyň 4-nji dekabrynda Türkmenistanyň Daşary işler ministrliginiň Halkara gatnaşyklary institutynda daşary ýurtlarda bolan talyplaryň çykyşlary guraldy. Onda Awstriýanyň Wena şäherinde geçirilen žurnalistika bilen bagly okuw sapaklaryna gatnaşan institutyň 4-nji ýyl talyby Annaberdi Kaşaňow özüniň görkezme çykyşyny ýerine ýetirdi. Okuw sapakda Ýewropada Howpsuzlyk we Hyzmatdaşlyk Guramasynyň merkezi edarasynda žurnalistika hem-de maglumat dünýäsi, onuň durmuşymyzda eýeleýän orny, häzirki zaman žurnalistikasynyň gazananlary we ony geljekde mundan beýläk-de ösdürmek barada pikir alşylandygy nygtaldy. Şeýle hem ýurdumyzyň bu abraýly gurama bilen bilelikde alyp barýan işleri we ony mundan beýläk-de ösdürmek babatda ýerine ýetirilýän özgertmeler dogrusynda söhbetler edilendigi çykyşda bellenip geçildi.
26-njy noýabrda Merkezi Aziýa ýurtlarynyň Daşary işler ministrleriniň orunbasarlarynyň her ýylky on dördünji duşuşygy geçirildi. Oňa institutymyzyň halkara gatnaşyklary fakultetiniň 2-nji ýyl talyby Abdykerim Annaýew gatnaşdy. Duşuşykda her ýurduň wekiliýetiniň öz medeniýetini beýan edýän çykyşlarynyň guralandygyny, biziň ýurdumyzyň bolsa, akyldar şahyrymyz Magtymguly Pyragynyň goşgularyny dürli dillerde ýerine ýetirendigini talybymyz çykyşynda belläp geçdi.
Şeýle-de, Russiýa Federasiýasynyň Moskwa şäherinde geçirilen halkara matematika olimpiadasyna institutymyzyň halkara ykdysady gatnaşyklary fakultetiniň 3-nji ýyl talyby Goçmyrat Penjiýew hem-de şol fakultetiň 2-nji ýyl talyby Bägül Hudaýberdiýewa dagylar gatnaşdylar. Olar bu olimpiadada 3-nji derejeli diploma mynasyp bolup ýurdumyza ýeňiş bilen dolanyp geldiler. Bu zehinli talyplarymyz hem çärede çykyş edip, döredip berilýän ajaýyp mümkinçilikler üçin Gahryman Arkadagymyza, Arkadagly Gahryman Serdarymyza tüýs ýürekden sag bolsun aýtdylar.
Baýnazar BAÝHANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.