Talyp ýaşlar gülküli sahna oýunlaryna tomaşa etdiler
2024-nji ýylyň 13-nji sentýabrynda paýtagtymyzyň Magtymguly adyndaky milli sazly drama teatrynda gülki agşamy geçirildi. Oňa paýtagtymyzyň ýaşaýjylary we myhmanlary bilen bir hatarda Türkmenistanyň Daşary işler ministrliginiň Halkara gatnaşyklary institutynyň mugallymlary hem-de talyp ýaşlary gatnaşdy. Gülküli sahna çykyşlaryna tomaşa etmeklik talyplaryň medeniýetli dynç almaklaryna we boş wagtlaryny peýdaly geçirmeklerine gönükdirildi.
Çäräniň dowamynda teatryň sahna ussatlarynyň ýerine ýetirmeginde birnäçe gülküli sahna oýunlary görkezildi. Höwes bildirýän tomaşaçylar sahna çykyp, ýerine ýetirilýän çykyşlara gatnaşmaga hem mümkinçilik aldylar. Bäsleşikler bilen utgaşan sahna çykyşlarynda tapawutlananlar sowgat hökmünde indiki sahna oýunlaryna dost-ýarlary bilen gatnaşmaga hukuk gazandylar. Türkmenistanyň halk artistleriniň, ussat aýdymçylaryň ýerine ýetirmegindäki aýdym-sazly çykyşlar tomaşaçylarda ýatdan çykmajak täsirleri galdyrdy we dowamly el çarpyşmalara beslendi.
Şamuhammet ELÝASOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.