«KÖPDILLILIK — TÄSIRLI ARAGATNAŞYGYŇ AÇARY» ATLY OKUW MASLAHATY GEÇIRILDI
2024-nji ýylyň 29-njy maýynda Türkmenistanyň Daşary işler ministrliginiň Halkara gatnaşyklary institutynda BMG-niň Baş Assambleýasy tarapyndan 2002-nji ýylyň 9-njy aprelinde №56/262 belgili «Köpdillilik» atly Rezolýusiýasynyň kabul edilmeginiň 22 ýyllygy mynasybetli «Köpdillilik — täsirli aragatnaşygyň açary» atly okuw maslahaty geçirildi. Okuw maslahatyna institutyň mugallymlary we talyplary gatnaşdylar.
Köpdillilik dürli ýurtlardan we medeniýetlerden bolan adamlar bilen aragatnaşyk saklamaga, olaryň gymmatlyklaryna, däp-dessurlaryna düşünmäge uly mümkinçilik berýär. Maslahatyň dowamynda çykyş edenler hem BMG-niň Baş sekretary Antoniu Guterrişiň köpdilliligiň halklaryň arasyndaky sazlaşykly aragatnaşygy ýola goýmakdaky, köptaraplaýyn diplomatiýany emele getirmekdäki, dialogy, çydamlylygy we özara düşünişmegi öňe sürmekdäki orny barada aýdanlaryna salgylanyp, köpdilliligiň ähmiýeti barada aýratyn nygtap geçdiler.
Okuw maslahatynyň ahyrynda oňa gatnaşyjylar ýurdumyzda daşary ýurt dillerini öwrenmekde zerur bolan ähli şertleri döredip berýän Gahryman Arkadagymyza, Arkadagly Gahryman Serdarymyza çäksiz alkyş sözlerini aýtdylar.
Şöhrat DIWANGULYÝEW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.