Saýlawlary KHBS-de şöhlelendirmek boýunça okuw maslahaty
2024-nji ýylyň 18-19-njy sentýabrynda Ýewropada Howpsuzlyk we Hyzmatdaşlyk Guramasynyň (ÝHHG) Aşgabatdaky Merkeziniň binasynda saýlawlary köpçülikleýin habar beriş serişdelerinde şöhlelendirmek boýunça okuw maslahaty geçirildi. Ol Daşary işler ministrliginiň, ÝHHG-niň Türkmenistandaky wekilhanasynyň hem-de Döwlet habarlar agentliginiň bilelikde guramagynda geçirildi. Okuw maslahatyna degişli edaralaryň, köpçülikleýin habar beriş serişdeleriniň wekilleri, ýokary okuw mekdepleriniň žurnalistika hünäriniň, şol sanda Türkmenistanyň Daşary işler ministrliginiň Halkara gatnaşyklary institutynyň mugallymlary hem gatnaşdylar.
Mälim bolşy ýaly, Türkmenistan ÝHHG bilen ynsanperwer ugurdaky, hususan-da, ylym we bilim ulgamyny ösdürmek boýunça özara bähbitli hyzmatdaşlygy netijeli ösdürýär. Hyzmatdaşlygyň çäklerinde degişli ugurlarda milli hünärmenler bilen okuw maslahatlary, duşuşyklar, bäsleşikler yzygiderli geçirilýär. Şu gezekki saýlawlary KHBS-de şöhlelendirmek boýunça okuw maslahaty hem milli hünärmenleriň žurnalistik başarnyklaryny ýokarlandyrmakdan ybaratdyr.
ÝHHG-niň bilermenleri degişli temada žurnalistik materiallary taýýarlamak, onlaýn platformalary netijeli peýdalanmak boýunça gymmatly maslahatlary berdiler. Okuw maslahaty sowal-jogap esasynda täsirli geçdi.
Selbi HOJALYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.