Sagdyn nesiller — Watanymyzyň geljegi
2025-nji ýylyň 19-njy martynda Myrat Garryýew adyndaky Türkmenistanyň Döwlet lukmançylyk uniwersitetiniň guramagynda «Möwsümleýin keselleriň öňüni almakda arasssaçylyk kada-düzgünleriniň orny» atly tema boýunça onlaýn okuw maslahaty geçirildi. Bu maslahata ýurdumyzyň ähli ýokary okuw mekdepleriniň, lukmançylyk orta hünär okuw mekdepleriniň, şeýle hem Türkmenistanyň Daşary işler ministrliginiň Halkara gatnaşyklary institutynyň mugallymlarydyr talyp ýaşlary gatnaşdylar.
Maslahatda çykyş edenler Gahryman Arkadagymyzyň başlangyjy bilen işlenip düzülen hem-de hormatly Prezidentimiziň parasatly baştutanlygynda üstünlikli durmuşa geçirilýän «Saglyk» Döwlet maksatnamasyndan gelip çykýan, şeýle hem «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynyň» çäklerinde durmuşa geçirilýän işler dogrusynda giňişleýin gürrüň etdiler. Şunuň bilen baglylykda, häzirki wagtda howanyň üýtgemegi bilen bagly ýüze çykyp biläýjek keselleriň öňüni almakda degişli arassaçylyk kadalarynyň berk berjaý edilmelidigine üns çekildi.
Bu maslahat Watanymyzyň geljegi bolan ýaş nesilleriň berk bedenli, sagdyn ruhly, kämil hünärmenler bolup ýetişmeklerine oňyn täsir etmek bilen, sagdyn durmuş ýörelgelerini, köpçülikleýin sporty wagyz etmekde aýratyn ähmiýete eýedir.
Adalat ŞAMURZAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.