Russiýa Federasiýasynyň Türkmenistandaky Medeniýet günleriniň çäginde “Pýotr Iliç Çaýkowskiniň ýubileýine tarap” atly nusgawy sazlaryň konserti geçirildi
2024-nji ýylyň 17-nji oktýabrynda Aşgabat şäheriniň Döwlet medeniýet merkeziniň Mukamlar köşgünde Russiýa Federasiýasynyň Türkmenistandaky Medeniýet günleriniň çäginde “Pýotr Iliç Çaýkowskiniň ýubileýine tarap” atly nusgawy sazlaryň konserti geçirildi. Konserte paýtagtyň ýaşaýjylary bilen birlikde Türkmenistan Daşary işler ministrliginiň Halkara gatnaşyklar institutynyň mugallymlary we talyplary gatnaşdy.
P.I.Çaýkowskiý adyndaky XV halkara bäsleşigiň ýeňijisi, rus we halkara ýaryşlarynyň baýragynyň eýesi, pianinoçy Dmitriý Masleýewiň ýerine ýetirmeginde P.I.Çaýkowskiniň we S.W.Rahmaninowyň eserleri ýaňlandy.
Şeýle hem, Medeniýet günleriniň çäginde Russiýanyň Milli saz muzeýi tarapyndan Çaýkowskiniň döredijiligine bagyşlanan “Çaýkowskiniň planetasy” atly sergi guraldy. Sergi muzeýiň gaznasyndaky taryhy resminamalar, şahsy zatlar, fotosuratlar we nota partituralary esasynda guralyp, ol rus medeniýeti hakynda has giňişleýin maglumat almaga ýardam etdi.
Medeni-ynsanperwer gatnaşyklar türkmen-rus hyzmatdaşlygynyň möhüm ugurlarynyň biri bolup durýar. Bu gatnaşyklar ähli döwürlerde hem halklaryň arasynda dostlugyň, özara düşünişmegiň köprüsi bolup hyzmat edýär. Magtymguly Pyragynyň doglan gününiň 300 ýyllygynyň halkara derejede giňden bellenilmegini munuň aýdyň mysaly hökmünde görkezmek bolar. Şu gezekki döredijilik çäresi bolsa, iki döwletiň taryhy we ruhy gymmatlyklary umumy bolan halklarymyzyň dostlugyny berkitmegi, köptaraplaýyn gatnaşyklary hil taýdan täze derejä çykarmagy maksat edinýändiginiň güwäsine öwrüldi.
Mahym AKGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
I ýyl talyby.