PASPORT GOWŞURYLYŞ ÇÄRESI GEÇIRILDI
25-nji sentýabrda Türkmenistanyň Döwlet migrasiýa gullugynda hormatly Prezidentimiziň gol çeken ynsanperwer Permanyna we taryhy Kararyna laýyklykda, ýurdumyzyň çäginde hemişelik ýaşaýan, raýatlygy bolmadyk adamlara Türkmenistanyň raýatynyň pasportynyň hem-de ýurdumyzda ýaşaýan daşary ýurt raýatlaryna Türkmenistanda ýaşamak üçin ygtyýarnamalaryň gowşurylyş dabarasy geçirildi.
Watanymyzyň Garaşsyzlyk baýramyna gabatlanan bu şanly waka ýurdumyzyň ýokary ynsanperwer däplerine we adamkärçilik ýörelgelerine üýtgewsiz ygrarlydygynyň nobatdaky aýdyň beýany boldy.
Bu çärä ýurdumyzda işleýän halkara guramalaryň wekilhanalarynyň ýolbaşçylary, Türkmenistanyň Daşary işler ministrliginiň, Türkmenistanyň Içeri işler ministrliginiň we degişli ministrlikleriň hem-de pudak edaralaryň wekilleri, hormatly ýaşulylar we eneler, ýurdumyzyň köpçülikleýin habar beriş serişdeleriniň wekilleri gatnaşdylar.
Garaşsyz, baky Bitarap Watanymyzyň 33 ýyllyk şanly toýuny toýlaýan günlerimizde 1146 sany raýatlygy bolmadyk adama Türkmenistanyň raýatlygynyň berilmegi hem-de 134 daşary ýurt raýatlaryna Türkmenistanda ýaşamak üçin ygtyýarnamalaryň berilmegi asylly ynsanperwer işleriň hormatly Prezidentimiziň ýolbaşçylygynda yzygiderli we üstünlikli dowam etdirilýändigini aýdyň äşgär edýär.
Çäräniň dowamynda Türkmenistanyň raýatlygyna kabul edilen raýatlar öz çykyşlarynda halkymyzyň parahat durmuşda ýaşamagy ugrunda ynsanperwer syýasaty alyp barýan hormatly Prezidentimiziň il-ýurt bähbitli beýik tutumly işleriniň mundan beýläkde rowaçlyklara beslenmegini arzuw etdiler!
Perman MERDANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.