Parahatçylyk dialogyny ilerledip
Düýn Türkmenistanyň Daşary işler ministrliginiň Halkara gatnaşyklary institutynda «Halkara gatnaşyklar: parahatçylyk dialogynyň medeniýeti» atly II halkara bäsleşigiň hem-de iki günläp dowam eden «Türkmenistanyň daşary syýasaty we diplomatiýasy: parahatçylygyň, howpsuzlygyň we durnukly ösüşiň hatyrasyna hyzmatdaşlyk» atly halkara ylmy-amaly maslahatyň ýapylyş dabarasy geçirildi. Oňa halkara bäsleşige we ylmy-amaly maslahata gatnaşyjylar bilen birlikde, ýurdumyzyň ýokary okuw mekdepleriniň professor-mugallymlarydyr talyplary hem gatnaşdylar.
12 — 14-nji maý aralygynda geçirilen bäsleşige jemi 140-dan gowrak, şol sanda Russiýadan, Gazagystandan, Gyrgyzystandan, Täjigistandan, Hytaý Halk Respublikasyndan, Özbegistandan, Amerikanyň Birleşen Ştatlaryndan 30-a golaý talyp hem-de magistr gatnaşdy. Bäsleşik ýekebara görnüşde guralyp, oňa türkmen hem-de daşary ýurtly professor-mugallymlar eminlik etdiler. Bäsleşigiň maksady ýaşlaryň parahatçylyk dialogynyň medeniýeti babatda bilimlerini artdyrmakdan ybaratdyr.
Bäsleşige gatnaşyjylar matematika, ekologiýa, durnukly ösüş we syýasat ýaly ugurlara degişli sowallara test görnüşinde jogap berdiler. Gatnaşyjylaryň 110-sy bäsleşigiň ýeňijisi diýlip yglan edildi we olaryň 21-si birinji, 35-si ikinji hem-de 54-si üçünji orna mynasyp boldular. Türkmen talyplary hem bäsleşikde üstünlikli çykyş edip, jemi 81 medal gazandylar. Olaryň 10-sy altyn, 26-sy kümüş, 45-si bolsa bürünç medallardyr.
— Mekdep okuwçysy döwrümden bäri ýurdumyzyň hem-de daşary ýurtlaryň taryhy bilen içgin gyzyklanýaryn. «Halkara gatnaşyklar: parahatçylyk dialogynyň medeniýeti» atly II halkara bäsleşigiň dürli ugurlar boýunça geçirilýändigini göz öňünde tutup, bäsleşige ykjam taýýarlykly geldik. Çeken yhlasymyz öz miwesini-de berdi. Men bu bäsleşikde birinji orna mynasyp boldum. Begenjimiň, buýsanjymyň çägi ýok. Meniň Türkmenistana-da, gözel şäheriňiz Aşgabada-da ilkinji gezek gelşim. Okuwçy wagtym halkara derejede geçirilýän çärelere gatnaşsam hem, talyp hökmünde şeýle bäsleşige ilkinji gezek gatnaşýaryn. Şol sebäpli-de bu çäräniň meniň üçin uly ähmiýete eýedigini aýratyn belläsim gelýär — diýip, Russiýa Federasiýasynyň Daşary işler ministrliginiň Moskwa döwlet halkara gatnaşyklar institutynyň magistri Ýekaterina Ýakuşewa söhbetdeş bolanymyzda aýtdy.
Türkmen diplomatiýasynyň milli mekdebinde bäsleşik bilen ugurdaşlykda geçirilen halkara ylmy-amaly maslahatyň umumy mejlisi tamamlanandan soňra, ol öz işini bölümçelerde dowam etdi. Ýeri gelende bellesek, bäsleşige 7, halkara ylmy-amaly maslahata bolsa 12 döwletden wekiller gatnaşdylar.
Bu çäreleriň dowam edýän günlerinde Türkmenistanyň Döwlet medeniýet merkeziniň Döwlet muzeýine, Türkmen halysynyň milli muzeýine, «Halk hakydasy» ýadygärlikler toplumyna, «Köne Nusaý» taryhy-medeni goraghanasyna, «Berkarar», «Arkaç» söwda we dynç alyş merkezlerine gezelençler guraldy. Munuň özi güneşli Diýarymyza gelen myhmanlara Türkmenistan bilen bagly ýakymly ýatlamalary bagyşlady.
Halkara bäsleşigiň we ylmy-amaly maslahatyň ýapylyş dabarasynda bäsleşigiň ýeňijilerine medallar, Hormat hatlary hem-de gymmat bahaly sowgatlar gowşuryldy. Şeýle hem dabara gatnaşyjylar hormatly Prezidentimiziň adyna Ýüzlenme kabul etdiler. Dabara tamamlanandan soňra, Türkmenistanyň Daşary işler ministrliginiň Halkara gatnaşyklary institutynyň talyplarynyň ýerine ýetirmeginde dost-doganlyk aýdym-sazlary ýaňlandy.
Baýnazar BAÝHANOW.
«Türkmenistan».