OKUW SAPAGY GEÇIRILDI
2024-nji ýylyň 1-nji maýynda Türkmenistanyň Daşary işler ministrligi tarapyndan Halkara gatnaşyklary institutynda «Ýaş alymlar geňeşiniň» gurnamagynda jemgyýetde kanunlaryň hökmürowanlygyny ösdürmek, intellektual eýeçiligi goramagyň döwlet kepilliklerini üpjün etmek we jenaýatçylykly ýol bilen alnan girdejileriň kanunlaşdyrylmagyna garşy hereket etmek boýunça kanunçylygy kämilleşdirmek maksatly alnyp barylýan işler bilen talyplary tanyşdyrmak üçin okuw sapagy geçirildi. Muňa institutyň Halkara hukugy fakultetiniň professor-mugallymlary we talyp ýaşlary gatnaşdylar.
Okuw sapagynda Magtymguly adyndaky Türkmen döwlet uniwersitetiniň mugallymy, Türkmenistanyň Baş prokuraturasynyň weterany Seitmet Baýamow çykyş etdi. Ol çykyşynyň dowamynda Intellektual eýeçiligi goramagyň hukuk esaslary, döwlet kadalaşdyrylyşy, intellektual eýeçiligiň bütindünýä guramasy, onuň wezipeleri barada aýdyp, Türkmenistanda intellektual eýeçilik ulgamynyň kuwwatynyň artdyrylmagy, ilatyň durmuş taýdan goraglylygyny üpjün edýän çäreleriň durmuşa geçirilmegi ýurdumyzda zähmet gatnaşyklarynyň döwrebap derejede ösdürilýändiginiň subutnamasydygyny belledi.
Ýeri gelende bellesek, türkmen halkynyň Milli Lideri, Gahryman Arkadagymyz Halk Maslahatynyň Prezidiumynyň mejlisinde hem bu ugra aýratyn üns berdi. Onuň hukuk binýadyny pugtalandyrmak, bu ugurdaky kanunçylygy kämilleşdirmek Gahryman Arkadagymyzyň taryhy çykyşyndan gelip çykýan wezipeleriň biridir.
Leýli ARAPOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.