OKUW SAPAGY GEÇIRILDI
2024-nji ýylyň 6-njy maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Konstitusiýasynyň kabul edilmegi bilen bagly okuw maslahaty geçirildi. Bu okuw maslahatyna Türkmenistanyň Mejlisiniň, Türkmenistanyň harby we hukuk goraýjy edaralarynyň wekilleri hem-de institutymyzyň mugallymlarydyr talyp ýaşlary gatnaşdylar.
Okuw maslahatynyň dowamynda çykyş edenler Türkmenistanyň oňyn Bitaraplygynyň parahatçylyk söýjüligiň, hoşniýetli goňşuçylyk gatnaşyklarynyň, milli däp-dessurlarynyň we demokratik taglymatlarynyň hem-de giň möçberli durmuş-ykdysady, jemgyýetçilik-syýasy özgertmeleriň berk binýady we kepillendirmesi bolup durýan Konstitusiýamyza daýanyp, hukuk, dünýewi döwleti, adalatly raýat jemgyýetine gurýandygy barada belläp geçdiler.
Şeýle-de döwletimizi mundan beýläk hem depginli ösdürmäge, Türkmenistanlylaryň asuda, abadan durmuşa geçirilýän döwlet we pudaklaýyn maksatnamalaryň, meýilnamalaryň ençemesi barada aýdyldy. Okuw maslahatynyň dowamynda talyp ýaşlar özlerini gyzyklandyrýan dürli sowallara jogap tapdylar.
Ogulşirin GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.