OKUW MASLAHATY GEÇIRILDI
2023-nji ýylyň 10-13-nji oktýabry aralygynda Ýewropada Howpsuzlyk we Hyzmatdaşlyk Guramasynyň (OSCE) Aşgabatdaky merkeziniň guramagynda daşky gurşawy goramak meselelerine bagyşlanan telegepleşikleri taýýarlamak boýunça okuw maslahaty geçirildi. Oňa halkara bilermenler, ýurdumyzyň teleýaýlymlarynyň wekilleri, ýokary okuw mekdepleriniň mugallymlary gatnaşdylar.
Okuw maslahatynyň dowamynda çykyş edenler häzirki döwürde ýurdumyzda daşky gurşawy goramak we ekologiýa abadançylygyny üpjün etmek, suw, ýer serişdeleriniň netijeli peýdalanylmagy, biologik köpdürlüligiň we tebigy aýratynlyklaryň saklanmagy, howanyň üýtgemegi bilen baglanyşykly meseleleri çözmek, gök zolaklaryň döredilmegi babatda uly işleriň alnyp barylýandygyny bellediler. Bellenilişi ýaly, Diýarymyzda ekologiýany durnukly saklamak babatda durmuşa geçirilýän işler döwletimiziň bu babatda öz üstüne alan halkara borçnamalaryny doly berjaý edýändigini tassyklaýar.
Şeýle hem okuw maslahatynyň çäginde žurnalistika bilimini ýokarlandyrmak, köpçülikleýin habar beriş serişdeleriniň wekilleriniň hünär derejesini kämilleşdirmek, milli hünärmenleriň habarlary, gyzykly telegepleşikleri taýýarlamaklary, wezipe borçlaryny doly ýerine ýetirmekleri, başarnyklaryny artdyrmaklary üçin häzirki zaman maglumat jemgyýetinde giň mümkinçilikleriň döredilendigi barasyndaky çykyşlar diňlenildi. Maslahatyň çäginde maglumat elýeterliligi, syýasy-jemgyýetçilik ähmiýetli taýýarlanan habarlary tele we radioýaýlymlaryň, gündelik neşirleriň üsti bilen dessin halk köpçüligine ýetirmek, awtorlyk hukugy barada pikir we tejribe alşyldy.
Täzegül KULJIKOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.