Nobatdaky geçirilen futbol duşuşygy
2024-nji ýylyň 27-nji noýabrynda paýtagtymyzdaky «Aşgabat» köpugurly stadionynda AFK-2 Çempionlar ligasynyň toparçalaýyn tapgyrynyň bäşinji aýlawynyň çäklerinde Türkmenistanyň «Altyn Asyr» futbol topary Yragyň «Eýr Fors» («Air Force») futbol toparyny kabul etdi. Oňa futbol janköýerleri, köp sanly myhmanlar, ýurdumyzyň ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň talyplary hem ruhubelentlik bilen tomaşa etmäge gatnaşdylar.
Ýeri gelende bellesek, ozal toparlar toparçalaýyn tapgyryň birinji aýlawynda duşuşdylar. Bagdatda geçirilen oýunda «Eýr Fors» ýeňiş gazandy, oýun 2:1 hasabynda tamamlandy. «Altyn Asyr» dört oýunda çykyş edip, «B» toparçada dördünji orny eýeledi, «Eýr Fors» bolsa üçünji orunda barýar.
Duşuşyk örän gyzykly we çekeleşikli ýagdaýda geçdi. Netijede, dostlukly döwletiň futbol topary 2:0 hasabynda üstün çykdy. Duşuşyk türkmen futbolçylarynyň tejribelerini kämilleşdirmäge möhüm itergi berdi.
Selbi GULMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.