«Nebitçi» çagalar dynç alyş we sagaldyş merkezinde myhmançylykda
2024-nji ýylyň 15-nji iýulynda Türkmenistanyň Daşary işler ministrliginiň Halkara gatnaşyklary institutynyň talyplary Gökdere jülgesindäki «Nebitçi» çagalar dynç alyş we sagaldyş merkezinde boldular. Bu ýerde Telewideniýe, radiogepleşikler we kinematografiýa baradaky döwlet komitetiniň «Ýaşlyk» teleradioýaýlymynyň, «Mir 24» halkara habarlar merkeziniň, şeýle hem türkmen diplomatiýasynyň milli mekdebiniň okuw studiýasynyň döredijilik toparynyň gatnaşmagynda çagalar bilen duşuşyk geçirilip, telegepleşikler ýazgy edildi. Dynç alýan çagalaryň arasynda guralan surat çekmek bäsleşigi hem-de aýdym-sazly dabara köpçülikleýin habar beriş serişdeleriniň wekilleriniň şu gezekki döredijilik sapary bilen özboluşly utgaşdy.
Mälim bolşy ýaly, bagtyýar çagalar şu günler ýurdumyzyň dürli künjeklerinde ýerleşýän çagalar dynç alyş we sagaldyş merkezlerinde, «Gökdere» jülgesinde hem-de «Awaza» milli syýahatçylyk zolagynda tomusky dynç alşyň şatlykly pursatlaryny başdan geçirýärler. Olaryň göwnejaý dynç almaklary, wagtlaryny gyzykly, şadyýan geçirmekleri üçin ähli amatlyklar döredilen bu merkezlerde döredijilik duşuşyklary, tebigatyň gözel ýerlerine gezelençler, dürli medeni çärelerdir sport ýaryşlary, bäsleşikler yzygiderli guralýar. Şu gezekki döredijilik saparynyň dowamynda hem Türkmenistanyň Daşary işler ministrliginiň Halkara gatnaşyklary institutynyň talyplary — geljekki halkaraçy žurnalistler Gökderäniň bu ajaýyp künjeginde wagtlaryny şadyýan geçirýän körpejeler bilen didarlaşyp, olaryň ýürek buýsançlaryny ýazga geçirdiler. Munuň özi žurnalistika hünärini saýlan ýaşlar üçin özboluşly tejribe meýdançasy bolup, dowam edýän tejribelik döwrüniň mazmunyny artdyrýar.
«Nebitçi» çagalar dynç alyş we sagaldyş merkezi barada aýdylanda, özüniň tebigy gözelligi bilen tapawutlanýan bu merkez 2008-nji ýylda açylyp, merkezde bir wagtyň özünde 500-den gowrak çaga dynç alyp bilýär. Bu ýerde medeniýet merkezi, saglyk nokady, naharhana, şeýle hem bedenterbiýe-sport bilen meşgullanmak üçin meýdançalar, döredijilik merkezleri, el hünärini, rus, iňlis dillerini öwrenmek üçin ýörite gurnaklar, kitaphana, muzeý hereket edýär. Bagtyýar çagalar merkezde döredilen giň mümkinçilikleriň ähmiýetini, bu ýerdäki ýatdan çykmajak pursatlaryny köpçülikleýin habar beriş serişdeleriniň üsti bilen paýlaşmaga mümkinçilik alandyklary üçin çaga ýüreginden çykýan hoşallyk sözlerini beýan etdiler. Gözleri begençden, kalplary şatlykdan pürepür körpe nesilleriň ýürek sözleri ata Watanymyzyň bagtyýar çagalygyň mekanydygyna ýene bir gezek aýdyň şaýatlyk edýär.
Leýli MURADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy hünäriniň I ýyl talyby.