Mugallymlar we talyp ýaşlar baýramçylyk konsertine gatnaşdylar
Gyş paslynyň ilkinji gününde – 1-nji dekabrda Halkara Bitaraplyk güni hem-de hemişelik Bitaraplygymyzyň şanly 29 ýyllygy mynasybetli Türkmenistanyň Döwlet medeniýet merkeziniň Mukamlar köşgünde geçirilen baýramçylyk konserti ajaýyp dabaralaryň biri boldy. Oňa paýtagtymyzyň ýaşaýjylary we myhmanlary bilen bir hatarda Türkmenistanyň Daşary işler ministrliginiň Halkara gatnaşyklary institutynyň talyplary we mugallymlary gatnaşdylar.
Türkmen hem-de daşary ýurt nusgawy kompozitorlarynyň dünýä belli operalaryndan ýerine ýetirilen aýdymdyr sazlar konserte gatnaşyjylaryň göwnüni galkyndyrdy. Türkmenistanyň Döwlet horunyň, Türkmenistanyň halk artisti Atageldi Garýagdyýewiň, Türkmenistanyň at gazanan artisti Selbinýaz Annadurdyýewanyň, aýdymçylar we sazandalar Begenç Moşşyýewiň, Näzik Nurlyýewanyň, Şatlyk Nurgeldiýewiň, Agajan Amadowyň şeýle-de meşhur dirižýorlaryň ýolbaşçylygyndaky döredijilik toparlaryň çykyşlary baýramçylyk joşgunyny belende göterip, dabara gatnaşyjylara ýatdan çykmajak ýakymly pursatlary bagyşlady. Çäräniň dowamynda ýaýbaňlandyrylan çykyşlar şowhunly el çarpyşmalar bilen utgaşdy.
Şamuhammet ELÝASOW,
Türkmenistanyň Daşary işler minsitrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.