«Ýol hereketiniň howpsuzlygy — ömrümiziň rahatlygy» atly biraýlyga bagyşlanan çäre geçirildi
2024-nji ýylyň 24-nji sentýabrynda Türkmenistanyň Daşary işler ministrliginiň Halkara gatnaşyklary institutynda ýurdumyzda geçirilýän «Ýol hereketiniň howpsuzlygy — ömrümiziň rahatlygy» atly biraýlyga bagyşlanan çäre gurnaldy. Bu çäräniň gurnaýjysy hökmünde ýokary okuw mekdebiň Dünýä dilleri kafedrasy çykyş etdi. Çäräniň dowamynda talyp ýaşlar rus, iňlis hem-de fransuz dillerinde ýörite prezentasiýalary görkezip, ýol hereketiniň düzgünlerini berjaý etmegiň wajypdygy hakynda giňişleýin gürrüň etdiler.
Şeýle-de gurnalan çäräniň dowamynda Dünýä dilleri kafedrasynyň «Lingvo World» ylmy-döredijilik gurnagy tarapyndan ýörite breýn-ring oýny geçirildi. Onuň dowamynda institutymyzyň talyplary dürli sowallara jogap berdiler. Bäsleşigiň netijesine laýyklykda, Halkara hukugy fakulteti 3-nji orna, Halkara gatnaşyklary we Halkara žurnalistikasy fakultetiniň talyplary 1-nji orna mynasyp boldular.
Çäräniň ahyrynda Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň mugallymlary talyp ýaşlara okuwlarynda üstünlikleri arzuw edip, ýene bir gezek ýol hereketiniň düzgünlerini berjaý etmegiň wajypdygyny ýatlatdylar.
Maýa ATAJANOWA,
TDIM-niň Halkara gatnaşyklary institutynyň
Dünýä dilleri kafedrasynyň uly mugallymy.