Maliýe howpsuzlygy boýunça IV halkara olimpiadasynyň deslapky saýlama tapgyry geçirildi
2024-nji ýylyň 29-njy aprelinde «Sanly çözgüt — IT meýdança» hojalyk jemgyýetinde Maliýe howpsuzlygy boýunça 4-nji halkara olimpiadasynyň deslapky saýlama tapgyry geçirildi.
Bäsleşigiň saýlama tapgyry adatdaky bolşy ýaly, ykdysadyýet, maliýe we karz, hukuk, hukuk howpsuzlygy we halkara gatnaşyklary ýaly ugurlarda geçirildi. Oňa ýurdumyzyň ýokary okuw mekdepleriniň talyplary, şol sanda Türkmenistanyň Daşary işler ministrliginiň Halkara gatnaşyklary institutynyñ talyplary hem gatnaşdylar.
Bäsleşigiň saýlama tapgyrynyň hukuk ugruna institutymyzyň 20-den gowrak talyplary gatnaşyp, üstünlikli netijeleri görkezdiler.
Bäsleşigiň şertine laýyklykda, iň ýokary netije gazanan talyplar bäsleşigiň Russiýa Federasiýasynyň Soçi şäherinde geçiriljek jemleýji tapgyryna gatnaşmaga hukuk gazandylar.
Biz ýaşlara okamaga, öwrenmäge, döretmäge, şeýle uly halkara bäsleşiklere gatnaşmaga giň mümkinçilikleri döredip berýän Gahryman Arkadagymyza, Arkadagly Gahryman Serdarymyza tüýs ýürekden sag bolsun aýdýarys!
Intizar TAGANNYÝAZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň
II ýyl talyby.