Makala bäsleşiginiň jemleri jemlenildi
2025-nji ýylyň 17-nji martynda Türkmenistanyň Daşary işler ministrliginiň Halkara gatnaşyklary institutynda Gahryman Arkadagymyzyň «Hakyda göwheri» atly kitaby boýunça Halkara žurnalistikasy fakultetiniň talyplarynyň arasynda yglan edilen makala ýazmak bäsleşiginiň jemleri jemlenildi. Döredijilik bäsleşigi institutyň Žurnalistikanyň nazaryýeti we amalyýeti kafedrasy tarapyndan guraldy.
Bäsleşige hödürlenen makalalarda Milli Liderimiziň çuňňur paýhasa ýugrulan «Hakyda göwheri» atly kitabynyň dürli ugurlardaky ähmiýetine seljerme berlip, talyp ýaşlar bu babatda özleriniň pikir-garaýyşlaryny giňişleýin beýan etdiler. Gahryman Arkadagymyzyň jöwher paýhasyndan syzylyp çykan bu esere esaslanyp, makalalarda şan-şöhratly geçmişimiz, milli gymmatlyklarymyz, halkymyzyň belent ynsanperwer, dost-doganlyk ýörelgeleri aýdyň şöhlelendirildi. Eminler topary hödürlenen makalalary seljerip, olaryň ýazylyş ussatlygyna, derwaýyslygyna, çeperçiligine, terbiýeçilik ähmiýetine laýyklykda iň gowy makalany saýladylar. Şeýlelikde, Halkara žurnalistikasy fakultetiniň II ýyl talyby Aýsona Amanjaýewanyň «Şöhratly taryhyň ýaňy» atly makalasy bäsleşikde tapawutlanyp, iň gowy makala diýlip yglan edildi.
Döredijilik bäsleşiginde ýeňiji bolan makala institutyň «Ýaş diplomatyň sesi» elektron gazetinde çap ediler.
Tumar BAKYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.