MAGTYMGULY PYRAGYNYŇ SAÝLANAN ESERLERINIŇ ITALÝAN DILINE TERJIME EDILEN ÝYGYNDYSYNYŇ TANYŞDYRYLYŞ DABARASY
2024-nji ýylyň 27-nji dekabrynda Türkmenistanyň Daşary işler ministrliginiň Halkara gatnaşyklary institutynda Magtymguly Pyragynyň saýlanan eserleriniň italýan diline terjime edilen ýygyndysynyň tanyşdyrylyş dabarasy geçirildi. Oňa daşary ýurtlaryň Türkmenistandaky diplomatik wekilhanalarynyň, ýurdumyzyň daşary ýurtlardaky diplomatik wekilhanalarynyň ýolbaşçylary, Daşary işler ministrliginiň işgärleri, professor-mugallymlar we talyp ýaşlar gatnaşdylar.
Dabaranyň başynda Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa çykyş edip, beýik şahyrymyzyň döredijiliginiň dünýäde öwrenilişi, şeýle hem italýan dilinde neşir edilen ýygyndysynyň ähmiýeti dogrusynda giňişleýin durup geçdi. Soňra Türkmenistanyň Italiýa Respublikasyndaky Adatdan daşary we Doly ygtyýarly ilçisi Toýly Kömekowyň, Italiýa Respublikasynyň Türkmenistandaky ilçihanasynyň işleri wagtlaýyn ynanylan wekili, işewürlik meseleleri boýunça attaşesi Karmelo Leonyň çykyşlaryna hem giň orun berildi. Şeýle hem Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alym kätibi, taryh ylymlarynyň kandidaty Kakajan Janbekowyň, Türkmenistanyň halk suratkeşi, Türkmenistanyň Gahrymany Saragt Babaýewiň, Magtymguly adyndaky Türkmen döwlet uniwersitetiniň Roman-german dilleri kafedrasynyň italýan dili mugallymy Aýsoltan Agamyradowanyň, Döwletmämmet Azady adyndaky Türkmen milli dünýä dilleri institutynyň Roman-german dilleri kafedrasynyň italýan dili mugallymy Mekan Saparowyň çykyşlary, Terjimeçileriň halkara assosiasiýasynyň agzasy, UNINT Rim uniwersitetiniň mugallymy Iwan Melkumýanyň wideoýüzlenmesi diňlenildi. Çykyş edenler beýik şahyryň döredijilik mirasynyň dünýä medeniýetiniň hazynasynyň aýrylmaz bölegidigini nygtadylar.
Häzirki wagtda deňhukuklylyk, dostluk we birek-biregiň bähbitlerini nazara almak ýörelgelerine esaslanýan türkmen-italýan gatnaşyklary hil taýdan täze derejä çykarylýar. Şunda Magtymguly Pyragynyň saýlanan eserleriniň italýan diline terjime edilmegi Türkmenistan bilen Italiýanyň arasynda dostlugyň, doganlygyň we ýakyn hyzmatdaşlygyň ýene bir aýdyň mysalydyr. Dabara gatnaşyjylar şahyryň garaýyşlarynyň beýleki halklar bilen hoşniýetli goňşuçylyk ýörelgelerine, däp- dessurlara ygrarlylyga esaslanýandygyny bellediler. Dabaranyň ahyrynda oňa gatnaşyjylar beýik şahyr Magtymguly Pyragynyň edebi mirasyny bütin dünýäde dabaralandyrýan türkmen halkynyň Milli Lideri Gahryman Arkadagymyza hem-de hormatly Prezidentimize alkyş sözlerini beýan etdiler.
Güljemile DÄDEBAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.
Şeýle hem bu barada şu ýerden hem okap bilersiňiz: