Magtymguly Pyraga bagyşlanyp maslahat geçirildi
2024-nji ýylyň 24-nji oktýabrynda Türkmenistanyň Daşary işler ministrliginiň Halkara gatnaşyklary institutynda Gündogaryň nusgawy şahyry we beýik akyldary Magtymguly Pyragynyň doglan gününiň 300 ýyllygy mynasybetli geçirilen «Döwürleriň we siwilizasiýalaryň özara arabaglanyşygy – parahatçylygyň we ösüşiň binýady» atly halkara forumyň ähmiýetine bagyşlanyp maslahat geçirildi. Oňa institutymyzyň halypa mugallymlary we talyplary gatnaşdylar.
Maslahatda çykyş edenler Magtymguly Pyragynyň edebi mirasynyň halklaryň arasyndaky dostlugyň we özara düşünişmegiň pugtalandyrylmagyna goşýan goşandy, ynsanperwerligiň, Watana söýginiň, umumadamzat gymmatlyklaryna hormatyň tükeniksiz çeşmesidigi, şonuñ ýaly-da beýik şahyryň şanly toýuna bagyşlanyp ýurdumyzda we daşary ýurtlarda dabaraly çäreleriň geçirilendigi, şahyryň dünýäniň ençeme ýurtlarynda heýkelleriniň açylandygy, bularyň ählisiniň bolsa halklaryň arasyndaky dost-doganlyk köprüleriniň pugtalandyrylýandygynyň aýdyň nyşanydygy barada gürrüň berdiler.
Şeýle-de ýaňy-ýakynda paýtagtymyzda daşary ýurt döwletleriniň baştutanlarynyň we ýokary derejeli wekilleriniň gatnaşmaklarynda geçirilen halkara forumyň jemgyýetçilik-syýasy, medeni-ykdysady we ylmy ähmiýeti juda uly bolan baýramçylyk hökmünde taryha girendigi, şahyryň agzybirlik, jebislik, dost-doganlyk, hoşniýetli gatnaşyklar baradaky çagyryşlarynyň dünýä jemgyýetçiligi tarapyndan giň goldawa eýe bolýandygy dogrusyndaky täsirli çykyşlar diňlenildi.
Maslahatyň ahyrynda oňa gatnaşyjylar beýik söz ussady Magtymguly Pyragynyň edebi mirasyny bütin dünýäde dabaralandyrýan Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak, tutýan tutumly işleriniň rowaç bolmagyny arzuw etdiler.
Şahnoza ÇARYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.