Höweslendiriji okuw sapagy
2024-nji ýylyň 29-njy iýunynda Türkmenistanyň Daşary işler ministrliginiň Halkara gatnaşyklary institutynda “Gujurly nesil” bilim merkezi tarapyndan kiçi we orta ýaşly raýatlaryň bilimlerini artdyrmak we özlerini kämilleşdirmek üçin iňlis, rus, hytaý, ispan dillerini öwretmek boýunça höweslendiriji okuw sapagy geçirildi.
Häzirki wagtda, daşary ýurt dillerini bilmezden, kämil derejeli hünärmen bolup ýetişmek mümkin däl. Çünki üçünji müňýyllyk adamzat taryhynda ylym-bilimiň we tehnikanyň örän çalt depginler bilen ösýän zamanasy boldy. Gahryman Arkadagymyzyň başyny başlan, hormatly Prezidentimiz tarapyndan dowam etdirilýän öňdengörüjilikli syýasaty netijesinde ýurdumyzda ylym-bilim ulgamy döwrüň ösen talaplaryna laýyk derejede toplumlaýyn we sazlaşykly ösdürilýär.
Daşary ýurt dillerini öwrenilende, şol ýurtlaryň medeniýeti, edebiýaty, däp-dessurlary bilen ýakyndan tanyşylýar. Şu nukdaýnazardan ugur alyp, bilim merkeziniň maslahatçylary rus, iňlis, amerikan ýazyjydyr-şahyrlaryň durmuşy, döredijiligi, jemgyýetdäki orny baradaky anyk maglumatlar esasynda gyzykly gürrüňleri berdi.
Annagül NAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.