"Hazar deňzi – durnukly ösüş we dolandyryş"
Türkmenistanyň Prezidenti Serdar Berdimuhamedowyň gol çeken Kararyna laýyklykda, 2022-nji ýylyň 16 maýynda Türkmenistanyň Daşary işler ministrliginiň, Halkara Okeanlar Institutynyň (IMO) we Türkmenistanyň Hazar Deňzi Institutynyň bilelikde gurnamagynda, «Hazar deňzi – durnukly ösüş we dolandyryş» atly sekizinji halkara okuw maslahaty öz işine başlady.
Bu halkara okuw maslahatyna Türkmenistanyň degişli ministrlikleriniň we pudaklaýyn dolandyryş edaralarynyň, Hazarýaka döwletleriň Türkmenistandaky ilçihanalarynyň wekilleri gatnaşýarlar.
Şol bir wagtda bu okuw maslahatyna ÝUNESKO-nyň işleri barada Türkmenistanyň Milli toparynyň Sekretariatynda okuw-önümçilik tejribesini geçýän Türkmenistanyň Daşary işler ministrliginiň Halkara gatnaşyklary institutynyň 4-nji ýyl talyby Jemal Rematullaýewa hem gatnaşýar.
Okuw maslahatynyň işine ÝUNESKO-nyň Hökümetara okeanografiki toparynyň ýerine ýetiriji sekretarynyň geňeşçisi, geografiýa ylymlarynyň doktory Ýuriý Olýunin we Azad Islam Uniwersitetiniň mugallymy, deňiz ylymlarynyň doktory Parwin Farçi gatnaşýar we bu okuw maslahatynyň dowamynda amaly taýdan barlag işleriniň geçirilişine gözegçilik edýär.
Halkara okuw maslahatynyň dowamynda häzirki wagtda umman dolandyrylyşy, BMG-niň deňiz hukugy hakynda halkara konwensiýalar, Halkara deňzindäki deňiz zolaklar we olara täsir edýän hukuk režimler, bilelikde özleşdirilýän zolaklar, Hazar deňzi sebitinde ekologik meseleler, ÝUNESKO-nyň Hökümetara okeanografiki Komissiýasynyň deňizlerde ylmy-barlag işleri geçirmekdäki we ummany özleşdirmekdäki we goramakdaky orny ýaly birnäçe degişli temalar boýunça birnäçe alymlaryň we doktorlaryň çykyşlary diňlenilýär.
Maksatnama laýyklykda, bu halkara okuw maslahatynyň ahyrynda oňa gatnaşan diňleýjilere degişli şahadatnamalar gowşurylar. Okuw maslahaty öz işini 27-nji maýa çenli dowam eder.
Jemal REMATULLAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň IV ýyl talyby.