“Halypa ýörelgesi – şägirt göreldesi” atly duşuşyk geçirildi
2024-nji ýylyň 5-nji martynda Türkmenistanyň Daşary işler ministrliginiň Halkara gatnaşyklary institutynda Türkmen diplomatiýasynyň taryhy muzeýinde türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň 3-nji Antalýa diplomatiýa forumyndaky syýasy filosofiki taryhy çykyşynyň ähmiýeti barada duşuşyk geçirildi. Bu duşuşyga Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň dosenti, tehniki ylymlaryň kandidaty Türkmenistanyň Adatdan daşary we Doly ygtyýarly Ilçisi, «Türkmenistanyň ussat diplomaty» tapawutlandyryş nyşanynyň eýesi, halypa mugallym Çary Nyýazow, şeýle hem institutyň talyplary gatnaşdylar. Halypa diplomat çykyşynda häzirki wagtda Türkmenistanyň Bitaraplyk, parahatçylyk söýüjilik we hoşniýetli goňşuçylyk ýörelgelerine esaslanýan daşary syýasaty durmuşa geçirip, dünýäniň ähli döwletleri bilen ikitaraplaýyn esasda, şeýle hem sebit we ählumumy gün tertibiniň möhüm meseleleriniň çözgütlerini ara alyp maslahatlaşmakda hem-de işläp taýýarlamakda yzygiderli hyzmatdaşlygy ösdürýändigi barada giňişleýin belläp geçdi. Talyplar üçin duşuşyk örän täsirli boldy. Duşuşygyň dowamynda halypa diplomat 2023-nji ýylyň sentýabrynda Birleşen Milletler Guramasynyň Baş Assambleýasynyň 78-nji sessiýasynda Türkmenistan döwletimiz tarapyndan öňe sürlen bu guramanyň howandarlygynda Ählumumy howpsuzlyk strategiýasyny işläp taýýarlamak baradaky teklibiň ähmiýeti barada gürrüň berip, talyp ýaşlary gyzyklandyran sowallara giňişleýin jogap berdi.
Perhat ÇARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň uly mugallymy.