HALKARA ZENANLAR GÜNÜNE BAGYŞLANAN DABARA
Berkarar döwletiň täze eýýamynyň Galkynyşy döwründe şöhratly pederlerimiziň paýhasly ýörelgeleri mynasyp derejede dowam etdirilýär we baýlaşdyrylýar. Bagtyýar durmuşyň hözirini görüp ýaşaýan halkymyzyň her bir güni toý-baýramlara beslenýär. Döwletli ojaklarda toýlar uludan tutulýar. Toýlar türkmen durmuşynyň aýrylmaz bölegine öwrülip, olarda ýaşaýşyň ählitaraplaýyn sazlaşygy jemlenýär. Zenanlar halkymyzyň buýsanjydyr. Olar häzirki günde döwletimiziň we jemgyýetimiziň hemmetaraplaýyn goldawy netijesinde ýurdumyzyň mundan beýläk-de gülläp ösmegine uly goşant goşýarlar. Gelin-gyzlaryň möhüm döwlet, syýasy işlere işjeň gatnaşmaklary adalatly, deňhukukly jemgyýetiň durnukly we sagdyn ösüşiniň wajyp şertleriniň biridir.
2024-nji ýylyň 5-nji martynda Türkmenistanyň Daşary işler ministrliginiň Halkara gatnaşyklary institutynda Halkara zenanlar güni mynasybetli baýramçylyk dabarasy geçirildi. Institutyň jemgyýetçilik guramalary tarapyndan gurnalan bu dabara institutymyzda zähmet çekýän professor-mugallymlar, talyp gelin-gyzlar gatnaşdylar. Baýramçylyk çäresinde zenan mugallymlara, işgärlere we talyp gelin-gyzlara Halkara zenanlar güni mynasybetli Türkmenistanyň Prezidentiniň adyndan pul sowgatlary gowşuryldy.
Dabaranyň dowamynda institutymyzyň döredijilik toparynyň taýýarlan baýramçylyk konsertinde talyp ýaşlar türkmen halkynyň mizemez gymmatlyklaryny, milli mirasymyzy, mähriban Watanymyzyň ösüşlerini, maşgala ojagyna wepaly mährem zenanlarymyzy wasp edýän ajaýyp aýdym-sazlary uly joşgun bilen ýerine ýetirdiler.
Aýmyrat MUHAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
fakultetiniň I ýyl talyby.