Gyzgalaňly geçirilen «Paýhas hüjümi»
2024-nji ýylyň 24-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrliginiň hem-de Daşary işler ministrliginiň Halkara gatnaşyklary institutynyň bilelikde guramagynda geçirilýän «Halkara gatnaşyklary: parahatçylyk dialogynyň medeniýeti» atly halkara bäsleşiginiň çäginde, akyl-paýhas hyzmatdaşlygy görnüşinde «Paýhas hüjümi» (Brainstorming) geçirildi.
Bu çärä halkara bäsleşiginiň gatnaşyjylary bolan Azerbaýjan Respublikasynyň, Eýran Yslam Respublikasynyň, Hytaý Halk Respublikasynyň, Gazagystan Respublikasynyň, Gyrgyz Respublikasynyň, Täjigistan Respublikasynyň, Türkiýe Respublikasynyň , Russiýa Federasiýasynyň ýokary okuw jaýlarynyň talyplary we olara ýolbaşçylyk edýän professor-mugallymlary gatnaşdylar.
Bu çäräniň esasy wezipesi halkara we sebit ýagdaýlarynyň derwaýys meselesini seljermek netijesinde, halkara subýektleriniň arasynda optimal dialog we hyzmatdaşlyk usullary hem-de olaryň görnüşleri boýunça pikir alyşmak, şeýle-de oňyn teklipleri hödürlemek bolup durýar.
«Dünýä ýüzündäki parahatçylyk» şygary bilen geçen bu pikir-alyşma diýseň gyzykly boldy. Onda birnäçe täze garaýyşlar ýüze çykyp taraplar olar dogrusynda maslahatlaşdylar. Şeýle-de gatnaşanlar geçirilen ýaryşlar we çäreler üçin Türkmenistanyň hökümetine çuňňur minnetdarlygyny bildirip, şunuň ýaly çäreleriň geljekde dowamly geçirilip durulmagynyň zerurdygyny bellediler.
Gülruh GELDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.