«German hukugynyň günleri» atly okuw maslahaty
2023-nji ýylyň 5-njy iýunynda Türkmenistanyň Daşary işler ministrliginiň Halkara gatnaşyklary institutynda GIZ sebitleýin maksatnamasynyň «Merkezi Aziýada hukuk döwletini ösdürmek» taslamasynyň hem-de Germaniýanyň akademiki alyş-çalyş gullugynyň (DAAD) guramagynda «German hukugynyň günleri» atly okuw maslahaty geçirdi. Wideoaragatnaşyk arkaly geçirilen bu okuw maslahatyna Türkmenistanyň Daşary işler ministrliginiň, Türkmenistanyň Adalat ministrliginiň, Türkmenistanyň Prezidentiniň ýanyndaky Döwlet gullugy akademiýasynyň, Türkmenistanyň Döwlet, hukuk we demokratiýa institutynyň wekilleri, şeýle-de, Türkmenistanyň Daşary işler ministrliginiň Halkara gatnaşyklary institutynyň, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň mugallymlarydyr talyplary onlaýn görnüşinde gatnaşdylar.
Okuw maslahatynyň dowamynda Germaniýa Federatiw Respublikasynyň Halkara hyzmatdaşlyk boýunça jemgyýetiniň hem-de Gazagystanyň ýokary okuw mekdepleriniň wekilleri çykyş etdiler. Çykyşlaryň barşynda Germaniýanyň administratiw we ynsanperwerlik hukugy, onuň aýratynlyklary barada täsirli gürrüňler edildi.
Okuw maslahaty 2023-nji ýylyň 9-njy iýunyna çenli dowam eder.
Arslan GUWANÇMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň II ýyl talyby.