GENDER MESELELERI BOÝUNÇA HALKARA BRIFING GEÇIRILDI
Dünýä ösüşiniň häzirki zaman şertleri we globallaşmagyň gapma-garşylyklary aýallaryň ýagdaýyna hem täsirini ýetirýär. Aýallaryň hukuklarynyň üpjün edilmegi demokratiýanyň pugtalandyrylmagyna, ýaşaýyş-durmuş şertleriniň derejesiniň gowulandyrylmagyna, durnuklylyga we geçirimlilige ýardam edýär. Aýallaryň mynasyp orny bolan, olaryň durmuş saýlawy, jemgyýetçilik we döwlet işine gatnaşmaga deň ygtyýarlyklary we deň mümkinçiligi bolan has durnukly we durmuşa ukyply ýurtlar täze ýüzýyllygyň meseleleriniň çözgüdine taýýardyrlar.
Garaşsyzlygyň ilkinji ýyllaryndan Türkmenistan aýallaryň ýagdaýyny gowulandyrmak we gender deňliginiň gazanylmagy boýunça çäreleri sazlaşykly durmuşa geçirýär. Türkmenistanyň Konstitusiýasyna laýyklykda, biziň ýurdumyzda erkekler we aýallar deň hukuklara we azatlyklara, olaryň durmuşa geçirilmegi üçin deň mümkinçiliklere eýedirler. Milli kanunçylygymyz erkekleriň we aýallaryň häkimiýet edaralaryna deňagramly gatnaşygynyň gazanylmagy üçin hukuk gurallaryny we kepilliklerini, aýallaryň ykdysady garaşsyzlygy üçin deň mümkinçilikleriň üpjün edilmegini we olaryň işiniň kämilleşdirilmegini we wezipe ösüşini, maşgaladaky hukuklaryň we jogapkärçilikleriň deň durmuşa geçirilmegi üçin şertleriň döredilmegini göz öňünde tutýar. Türkmenistan döwletimiz bu ugurda birnäçe halkara guramalary, şol sanda Ýewropada Howpsuzlyk we Hyzmatdaşlyk Guramasy bilen ysnyşykly hyzmatdaşlygy amala aşyrýar. Bu hyzmatdaşlygyň çäklerinde 2024-nji ýylyň 28-nji noýabrynda Beýik Britaniýanyň Milli Polisiýa ýolbaşçylarynyň Geňeşi tarapyndan Gender meseleleri boýunça britan polisiýa gulluklarynyň alyp barýan işi bilen tanyşdyrmak maksady bilen, Ýewropada Howpsuzlyk we Hyzmatdaşlyk Guramasynyň Aşgabatdaky Merkezinde wideo-aragatnaşyk arkaly halkara brifing geçirildi. Bu maslahata Türkmenistanyň Içeri işler, Zähmet we ilaty durmuş taýdan goramak ministrlikleriniň, Döwlet, hukuk we demokratiýa institutynyň, Zenanlar Birleşiginiň Merkezi Geňeşiniň hem-de Türkmenistanyň Daşary işler ministrliginiň Halkara gatnaşyklary institutynyň wekilleri gatnaşdylar. Maslahatyň maksady britan polisiýasynyň işi hem-de daşary ýurtlarda aýal-gyzlara garşy zorluk, gender deňsizliginiň öňüni almak we oňa garşy göreşmegiň usullaryny tanyşdyrmak we tejribe alyşmakdyr. Bu maslahatda çykyş eden daşary ýurtly hünärmenler özleriniň bu ugurda alyp barýan işleri barada hem giňişleýin gürrüň berdiler.
Merjen GURBANNAZAROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme
hukuk öwreniş kafedrasynyň
uly mugallymy.