«GELSE NOWRUZ ÄLEME, REŇ KYLAR JAHAN PEÝDA» ATLY BAÝRAMÇYLYK DABARASY
2024-nji ýylyň 15-nji martynda Türkmenistanyň Daşary işler ministrliginiň Halkara gatnaşyklary institutynyň ilkinji Zenanlar guramasy bilen Žurnalistikanyň nazaryýeti we amalyýeti kafedrasynyň «Ýaş žurnalistler» ylmy-döredijilik gurnagynyň bilelikde gurnamagynda zeminde parahatçylygy, hoşniýetli goňşuçylygy, täzelenişi we tebigatyň janlanmagyny alamatlandyrýan Milli bahar baýramy – Halkara Nowruz güni mynasybetli «Gelse Nowruz äleme, reň kylar jahan peýda» atly aýdym-sazly döredijilik dabarasy geçirildi. Oňa Türkmenistanyň Döwlet medeniýet merkeziniň Döwlet kitaphanasynyň kitaphanaçysy halypa Bibigözel Mämmedowa, Aşgabat şäheriniň 51-nji orta mekdebiniň mugallymy Ogulnabat Owlakowa, şeýle-de institutyň aýdym-saz toparynyň çeper höwesjeňleri we döredijilik bilen içgin gyzyklanýan talyp ýaşlary gatnaşdylar.
Dabarada çykyş edenler adamzadyň iň gadymy baýramy bolan Nowruz baýramynyň taryhy, aýratynlygy, onuň özboluşly däp-dessurlary barada gürrüň etdiler. Nusgawy şahyrymyzyň 300 ýyllyk toýy mynasybetli institutyň talyp gyzlary tebigatymyzyň gözelliginiň, ýaşlygyň ýarany bolan bahar paslynyň waspyny ýetirýän türkmen edebiýatynyň görnükli wekilleriniň miras galdyran ajaýyp goşgularyna döredilen aýdym - sazlary ýerine ýetirdiler.
Duşuşykda edilen gyzykly çykyşlar, ýaňlanan ajaýyp aýdym-sazlar oňa gatnaşyjylarda ýakymly täsirleri galdyrdy.
Oraztäç ÇAPAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň III ýyl talyby.