Fransuz dili boýunça ders bäsleşiginde üstünlik gazanan mekdep okuwçylaryny sylaglamak dabarasy
2023-nji ýylyň 8-nji iýunynda Türkmenistanyň Daşary işler ministrliginiň Halkara gatnaşyklary institutynda Fransiýa Respublikasynyň Türkmenistandaky Ilçihanasynyň ýanyndaky Fransuz instituty tarapyndan Aşgabat şäheriniň we ýurdumyzyň welaýatlarynyň fransuz dili okadylýan orta mekdepleriniň okuwçylarynyň arasynda fransuz dili boýunça 2023-nji ýylyň aprel-maý aýlarynda diktant ýazmak, sowalnama jogap bermek we “Howa we wagt” temasy boýunça söhbetdeşlik gurnamak şertleri boýunça Türkmenistanda üçünji gezek geçirilen ders bäsleşiginiň ýeňijilerini yglan etmek we sylaglamak dabarasy geçirildi. Bu dabara Fransiýa Respublikasynyň Türkmenistandaky Adatdan daşary we Doly ygtyýarly Ilçisiniň wezipesini wagtlaýyn ýerine ýetirijisi hanym Magali Katažar, Fransuz institutynyň direktory jenap Roman Guwerne, şol institutyň wekilleri, Türkmenistanyň Bilim ministrliginiň wekili, Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa, institutyň Dünýä dilleri kafedrasynyň fransuz dili mugallymy Ogulbeg Gazakowa, Aşgabat şäheriniň we welaýatlaryň orta mekdepleriniň fransuz dili mugallymlary we mekdep okuwçylary, institutymyzyň fransuz dilini öwrenýän talyplary gatnaşdylar.
Dabarany Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa açyp, ders bäsleşiginde üstünlik gazanan mekdep okuwçylaryny gutlady hem olara okuwlarynda üstünlikleri arzuw etdi. Dabarada Fransiýa Respublikasynyň Türkmenistandaky Adatdan daşary we Doly ygtyýarly Ilçisiniň wezipesini wagtlaýyn ýerine ýetirijisi hanym Magali Katažar çykyş edip, bu ders bäsleşigine Aşgabat şäheriniň we welaýatlaryň fransuz dili okadylýan orta mekdeplerinden köp sanly okuwçylaryň gatnaşandygyny belledi.
Institutymyzyň fransuz dilini öwrenýän talyplary Magtymguly Pyragynyň fransuz diline terjime edilen goşgularyny, Gahryman Arkadagymyzyň fransuz diline terjime edilen «Ahalteke bedewi - biziň buýsanjymyz we şöhratymyz» («L’Akhal-Téké, gloire et fierté du Turkménistan») atly kitabyndan parçany çeper okadylar we fransuz dilinde «Dernier métro» aýdymy aýdyldy. Şeýle-de, fransuz dilinde taýýarlanylan diwar gazetleriniň, okuw kitaplarynyň, sözlükleriň, çeper eserleriň sergisi guraldy.
Aşgabat şäheriniň we welaýatlaryň fransuz dili okadylýan orta mekdeplerinden 3 dereje boýunça (welaýatlardaky mekdep okuwçylary; 3-nji synpdan 7-nji synpa çenli mekdep okuwçylary; 8-nji synpdan 11-nji synpa çenli mekdep okuwçylary) I, II we III orny eýelän ýeňijiler yglan edildi. Ýeňijiler Türkmenistanyň Bilim ministrliginiň we Fransiýanyň Ilçihanasynyň diplomlary hem bäsleşigiň hemaýatkärleri bolan Bouygues Turkmen, TotalEnergie we VINCI Construction kompaniýalary, fransuz dilinde gürleýän ýurtlaryň (Ermenistan, Rumyniýa, Ukraina, Belgiýa, Şweýsariýa, Kanada) ilçihanalary, «Tissot» şweýsar sagat firmasy, «Alliance/Boutique de Paris» dükany, «La Tartine» fransuz çörek bişirilýän kärhanasy, «Dessange» gözellik salony, «Chopard» parfýumeriýasy, «Eurocosmetics» kompaniýasy, «Bossan Concept» dükany tarapyndan taýýarlanan sowgatlar bilen sylaglanyldy.
Baýramdurdy AMANBERDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň III ýyl talyby.
Şeýle hem bu barada şu ýerden
okap bilersiňiz: