ENERGETIKA DIPLOMATIÝASYNA BAGYŞLANAN NOBATDAKY OKUW SAPAGY
2025-nji ýylyň 12-nji iýunynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň «Energetika diplomatiýasy» ugry boýunça nobatdaky okuw sapagy geçirildi.
Okuw sapagynda Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň mugallymy Perhat Mahremow «Dünýä energetika diplomatiýasynyň global merkezleriniň energetika strategiýalary» atly tema boýunça giňişleýin gürrüň berdi.
Onda hormatly Prezidentimiziň energetika diplomatiýasy boýunça öňe sürýän başlangyçlary, «ýaşyl» energetikanyň ähmiýeti, ýurdumyzda ýangyç-energetika serişdeleriniň önümçiliginiň we gazylyp alnyşynyň depginini düýpli ýokarlandyrmak we ýurdumyzyň halkara derejesinde energetika pudagynda strategik hyzmatdaşlyk gatnaşyklaryny saklamak babatda, şeýle hem bu ugurda halkara guramalaryň ýerine ýetirýän işleri barada talyplara giňişleýin gürrüň berildi. Şol sanda, Türkmenistanyň howanyň üýtgemegi boýunça Pariž ylalaşygyny hem-de Birleşen Milletler Guramasynyň Howanyň üýtgemegi baradaky Çarçuwaly konwensiýasyndan gelip çykýan borçlary iş ýüzünde üstünlikli amala aşyrýandygy aýratyn nygtalyp geçildi.
Täsirli geçen okuw sapagynyň soňunda talyp ýaşlar özleriniň gyzyklanýan soraglaryna jogaplary aldylar.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.