DÜZME BÄSLEŞIGINIŇ ÝEŇIJILERI SYLAGLANYLDY
2023-nji ýylyň 15-nji iýunynda Türkmenistanyň Daşary işler ministrliginiň Halkara gatnaşyklary institutynda ýurdumyzyň ýokary okuw mekdepleriniň talyplarynyň arasynda yglan edilen «XXI asyrda diplomatiýanyň orny» («Роль дипломатии в XXI веке») atly esse (düzme) bäsleşiginiň ýeňijilerini sylaglamak dabarasy geçirildi. Bäsleşik Türkmenistanyň Daşary işler ministrliginiň Halkara gatnaşyklary instituty tarapyndan Türkmenistanyň gurnamagynda 2023-nji ýylyň «Parahatçylygyň kepili hökmünde dialogyň halkara ýyly» diýlip yglan edilmeginiň hormatyna guraldy.
Düzme ýazmak bäsleşigi «Türkmenistanda daşary ýurt dillerini okatmagy kämilleşdirmegiň Konsepsiýasyny» üstünlikli durmuşa geçirmek, şeýle-de bilim ulgamynda talyplaryň dil öwrenmek höwesini artdyrmak maksady bilen, ýurdumyzyň ýokary okuw mekdepleriniň talyplarynyň arasynda geçirildi.
Bäsleşigiň netijeleri boýunça Baş baýraga Döwletmämmet Azady adyndaky Türkmen milli dünýä dilleri institutynyň talyby Arslan Mämmedow mynasyp boldy. Halkara ynsanperwer ylymlary we ösüş uniwersitetiniň talyby Meňli Çaryýewa I orna, Döwletmämmet Azady adyndaky Türkmen milli dünýä dilleri institutynyň talyby Mekan Annagulyýew II orna, Magtymguly adyndaky Türkmen döwlet uniwersitetiniň talyby Aýjeren Orazberdiýewa III orna mynasyp boldy.
Şeýle-de halkara gatnaşyklary ugrundan bilim alýan talyp ýaşlaryň arasynda Türkmenistanyň Daşary işler ministrliginiň Halkara gatnaşyklary institutynyň talyplary Aýgül Meredowa I orna, Oguzhan Piriýew II orna, Erem Döwletmyradow, Ejeş Taganowa, Dawut Nazmyradow III orna mynasyp boldular.
Ýeňiji bolan talyplara Türkmenistanyň Daşary işler ministrliginiň Halkara gatnaşyklary institutynyň Diplomlary hem-de ýurdumyzyñ Senagatçylar we telekeçiler partiýasynyñ Aşgabat şäher komitetiniñ we «Aýdyň gijeler» hojalyk jemgyýetiniň hemaýatkärliginde gymmat bahaly sowgatlar gowşuryldy.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy hünäriniň I ýyl talyby.