DAŞARY ÝURTLY MYHMANLAR ÜÇIN GYZYKLY GEZELENÇLER GURNALDY
2024-nji ýylyň 24-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bilim ministrliginiň hem-de Daşary işler ministrliginiň Halkara gatnaşyklary institutynyň bilelikde guramagynda geçirilýän «Halkara gatnaşyklary: parahatçylyk dialogynyň medeniýeti» atly halkara bäsleşiginiň maksatnamasynyň çäklerinde daşary ýurtly myhmanlar Türkmen halysynyň milli muzeýine we Türkmenistanyň medeniýet merkeziniň Döwlet muzeýine baryp gördüler.
Bu gezelenje halkara bäsleşiginiň gatnaşyjylary bolan Azerbaýjan Respublikasynyň, Eýran Yslam Respublikasynyň, Hytaý Halk Respublikasynyň, Gazagystan Respublikasynyň, Gyrgyz Respublikasynyň, Täjigistan Respublikasynyň, Özbegistan Respublikasynyň, Türkiýe Respublikasynyň, Russiýa Federasiýasynyň ýokary okuw jaýlarynyň talyplary we olara ýolbaşçylyk edýän professor-mugallymlary gatnaşdylar. Gezelenjiň barşynda myhmanlar Türkmen halysynyň milli muzeýine bardylar, türkmen halkynyň taryhyny wasp edýän nepis halylarymyzyň taryhy bilen tanyşdylar. Myhmanlary türkmen gelin-gyzlarynyň nepislik bilen dokan Ginnesiň rekordlar kitabyna giren halylarymyz, ýüň we ýüpek halylarymyz,türkmeniň gara öýi, milli egin-eşikleri haýran galdyrdy. Myhmanlar muzeýde türkmen halysynyň dokalyşy bilen tanyşdylar we halyny özleri dokap gördüler.
Myhmanlar haly muzeýinden çykyp Türkmenistanyň medeniýet merkeziniň Döwlet muzeýine geldiler. Bu ýerde myhmanlar türkmen halkynyň şöhratly taryhyna degişli eksponatlar bilen tanyşdylar. Özbegistan Respublikasyndan gelen myhman Hojaýew Lutfiddin Nasrullaýewiç Türkmenistanyň medeniýet merkeziniň Döwlet muzeýiniň özünde galdyran täsiri barada şeýle gürrüň berdi: ”Türkmen halky bilen özbek halkynyň dostlugy gadymdan bäri dowam edip gelýär. Biz muzeýe gelenimizde türkmeniň gadymy döwrüne degişli taryhy maglumatlar, Marguş şalygynyň, Parfiýa döwletiniň, Nusaý galalarynyň tapyndylary, Garaşsyz baky Bitarap döwletiniň ýeten belent sepgitleri barada goýlan eksponatlar bizde örän uly täsir galdyrdy. Mende türkmen halkynyň däp-dessurlary uly täsir galdyrdy. Ula hormat goýşuňyz, kiçini hormatlaýşyňyz bize ýarady. Sebäbi ula hormat goýup kiçini sylaýan döwletiň geçmişem bolýar, geljegem, diýmek, bu döwlet mizemezdir”.
Gezelenje gatnaşyjylar ýurdumyzda ýaş nesilleriň ukyp-başarnyklaryny, zehin aýratynlyklaryny ýüze çykarmaga döredilýän giň mümkinçilikler üçin hormatly Prezidentimize minnetdarlyk sözlerini aýtdylar.
Suraý AKMYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti
öwreniş ylymlary kafedrasynyň mugallymy.