“Daşary ýurt dillerini okatmagy mundan beýläk-de kämilleşdirmegiň esasy ugurlary” atly usulyýet maslahaty geçirildi
2024-nji ýylyň 5-nji sentýabrynda Türkmenistanyň Bilim ministrliginiň ýolbaşçylygynda Döwletmämmet Azady adyndaky Türkmen milli dünýä dilleri institutynda Türkmenistanyň hünär bilimi edaralarynda okaýanlaryň daşary ýurt dillerini özleşdiriş derejesini bahalandyrmagyň netijeleri boýunça “Daşary ýurt dillerini okatmagy mundan beýläk-de kämilleşdirmegiň esasy ugurlary” atly usulyýet maslahaty geçirildi.
Maslahata ýurdumyzyň ýokary we orta hünär okuw mekdepleriniň mugallymlary bilen birlikde Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň mugallymlary Maýa Atajanowa, Osman Hemzaýew we Maýa Çaryýewa dagy gatnaşdylar. Usulyýet maslahatynda “Türkmenistanda daşary ýurt dillerini okatmagy kämilleşdirmegiň Konsepsiýasynda” bilim ulgamyny döwrüň talaplaryna laýyk ösdürmek babatda kesgitlenen wezipeler, daşary ýurt dillerini okatmagyň usulyýetini kämilleşdirmek ugrunda gazanylan netijeler, ýurdumyzyň bilim ulgamyndaky halkara hyzmatdaşlygyň ýeten sepgitleri, bilimiň sanly gurşawyny emele getirmek hem-de innowasion bilim tehnologiýalaryny ornaşdyrmak ugrunda ýerine ýetirilmeli işler barada çykyşlar diňlendi. Şeýle hem, Türkmenistanda sanly bilim ulgamyny ösdürmek, daşary ýurt dillerini okatmagy kämilleşdirmegiň Konsepsiýalaryna laýyklykda okatmagyň usullary, Türkmenistanyň hünär bilimi edaralarynda okaýanlaryň daşary ýurt dillerini özleşdiriş derejesini bahalandyrmak ýaly meselelere seredilip geçildi.
Mundan başga-da maslahatyň çäginde Türkmen halkynyň Milli Lideri Gahryman Arkadagymyzyň, Hormatly Prezidentimiz Arkadagly Gahryman Serdarymyzyň kitaplarynyň, Magtymguly Pyragynyň edebi mirasyna degişli ýygyndylaryň, goşgular toplumynyň, diller dünýäsine öwrülen institutyň professor-mugallymlarynyň taýýarlan okuw kitaplarynyň, talyp ýaşlaryň bilim, ylmy-döredijilik, taslama bäsleşiklerinde, olimpiadalarynda we sportda gazanan üstünlikleriniň we milli amaly-haşam sungatynyň gymmatlyklarynyň sergisi gurnaldy.
Osman HEMZAÝEW,
Türkmenistanyň Daşary işler ministrliginiň
Halkara gatnaşyklary inistitutynyň
Dünýä dilleri kafedrasynyň uly mugallymy.