Dabaraly geçirilen çäre
2025-nji ýylyň fewral aýynyň 21-ne Ýaponiýanyň Türkmenistandaky Ilçihanasynyň guramagynda bu ýurduň Imperatory Naruhitonyň doglan güni mynasybetli “Gül zemin” söwda we dynç alyş merkeziniň “Altyn” toý mekanynda resmi kabul edişlik çäresi geçirildi. Bu dabara ýurdumyzdaky daşary ýurt ilçihanalarynyň, halkara guramalarynyň wekilleri bilen bir hatarda Türkmenistanda ýapon dili öwredilýän ýokary we orta okuw mekdepleriniň mugallymlary hem gatnaşdylar.
Dabaraly çäre ýaponiýanyň Türkmenistandaky ilçisi Sasaki Hiroşiniň gelen myhmanlara minnetdarlyk sözleri we gutlaglary bilen başlady. Soňra Türkmenistanyň Ministrler Kabinetiniň Başlygynyň Orunbasary, Daşary işler ministri Raşid Meredowyň çykyşy bilen dowam etdi. Dabara aýdym-sazly çykyşlar bilen utgaşykly dowam edip, Ýaponiýa döwletiniň medeniýeti, däp-dessury, taryhy geçmişi we häzirki döwürde gülläp ösüşi barada maglumatlar bilen üpjün edilen slaýdlar arkaly myhmanlara uly täsir ýetirdi. Şeýle hem, ýapon halkynyň bol, näz-nygmatly saçagy giňden taýýarlanyp, myhmanlara hödürlenildi.
“Halkara parahatçylyk we ynanyşmak” ýylynda geçirilen bu dabaraly çäre türkmen topragynda halkara ulgamynyň wekilleriniň bir saçagyň başyna jemlenmegi dost-doganlyk gatnaşyklarynyň barha berkeýändiginiň, hoşniýetli gatnaşyklaryň dabaralanýandygynyň aýdyň mysalyna öwrüldi.
Maýa ATAJANOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň uly mugallymy.
Bu barada şu ýerde hem okap bilersiňiz: