Çäksiz söýginiň gözbaşy
Heý-de, unudyp bolarmy,
Janyňa janyn gatany?!
Çirim etmän uzyn gije,
Daň saz berende ýatany.
Heý-de, unudyp bolarmy,
Ömründen ömür bereni?!
Suwsan çagyň ýyly mähre,
Gaşyňda gujak gereni.
Heý-de, unudyp bolarmy,
Daşyňa gala bolany?!
Ulaşaňda gaýgy-gama,
Derdiňi ilki duýany.
Unudyp bolarmy, heý-de,
Iň mährem, eziz ynsany?!
Unutsaň gurap, solmazmy,
Gursakda adam ynsaby?!
...Radioda ajaýyp aýdym ýaňlanýar: «Sen çyplaň inipdiň ýagty jahana, seni dünýä getireni unutma!». Aýdymyň jadyly owazyna maýyl bolup durşuňa, dünýädäki iň mähribän ynsanyň jahandaky ähli owazdan mährem sesini eşitmek üçin telefona eliňi ýetireniňi duýman galýarsyň. Şolbada hem oňa jaň gelýär. Jaň edýän ynsan — ynsanlaryň seresi, ýaşaýşyň gözbaşy. Ol ýene-de menden öňürtilemegi başardy. Näme üçindir, her gezek oňa ilkinji bolup jaň etmegi ýüregime düwsem-de, ol menden öňürtmegi başarýar. Bilmezlikde, durmuşyň hysyrdysyna gümra bolup, başagaýsyrap ýörşüňe, özümden beter meniň aladamy edýän ynsany az wagtlyk unudaýsaňam, ol asla muňa ýol bermeýär. Onuň mähirden pürepür sesini eşidip, öý-içeri barada, obanyň hal-ahwaly hakda soraýarsyň. Ol ýerde ähli zadyň gülala-güllükdigini, obadaşlaryň bagtyýar durmuşyň hözirini görüp, asuda, parahat ýaşaýandyklaryny eşidip, ýüzüňde şatlykdan doly ýylgyryş emele gelýär. Yz ýanyndanam sowallar ýagyp ugraýar: «Eşikleriňi taýýarladyňmy? Garnyň dokmy? Gerek zadyň barmy?». Içiňden: «Wah, synaglarda-da şeýle sowallar berilse bolmajakmy?!» diýeniňi duýman galýarsyň. Bu sowallaryň adaty, ýönekeý bolup görünmegi-de mümkin. Ýöne olaryň aňyrsynda çäksiz alada, yssy mähir, bir söz bilen aýdanyňda, päkize ýürek bar. Gündelik başagaýlygyň içinde şeýle sowallary başga kimden eşitjek diýsene?! Berilýän sowallaryň aglaba bölegi «Ertir haýsy sapak bar? Depderiňi ýazdyňmy? Tabşyrygy ýerine ýetirdiňmi?» ýaly, ýa-ha iş ýa-da adamlaryň özlerine gerek zatlar bilen baglanyşykly sowallar. Ýeriň ýüzünde özünden özge ynsan hakda şeýle aladalanmagy başarýan başga ynsan beri barmyka?! Adam tebigaty boýunça köplenç özi hakda oýlanyp, özi barada aladalanyp gezegen bolýar ahyry?! Emma onda bu ýagdaýa ters gelýän keramat bar. «Gudrat göreýin diýseň, daglara bar» diýilýär welin, mertebesi daglardan hem beýik bu ynsanyň her sözi tükeniksiz mähir-muhabbetden doly. Onuň heniz dünýäniň agyna-garasyna düşünmeýän çagalyk döwrüňem, epeý ýigit çykan wagtyňam (onuň gözünde entegem çaga) «Men süýji halamok, sen arkaýyn iýiber» diýýän diliniň gurbany bolsaň!
Hakyky söýginiň sakasynyň nirededigi hakda oýlanyp görüpmidiňiz?! Adamzat neslini dowamat dowam eýleýän söýgi onuň ýüreginden gözbaş alýar. Megerem, şol söýgi, ynsana päk zähmeti bilen Watanyň ösüşine mynasyp goşandyny goşmaga, maşgalasynyň abatlygy, agzybirligi üçin ýadawsyz zähmet çekmäge güýç berýändir.
Käýarym ýaşlyk edip, oýlanyşyksyz söz aýdaýsaňam, bilmezlikden göwnüne degäýseňem, hiç hili zowalsyz seni bagyşlap biljek merhemet hem onda bar. Jahanda onuň üçin iň gymmatly barlygy bolan perzendini Watana gerek bolanda, gözüni gyrpman uzak ýollara atarjak Tumar şa, Altynjan hatyna, has takygy, hakyky türkmen zenanyna mahsus mertlik, edermenlik hem dünýäniň diregi bolan şol ajaýyp ynsanda bar. Ol ynsanyň ady Eje!..
Yhlas Hallyýew,
Türkmenistanyň Daşary işler ministrliginiň
Halkara gatnaşyklary institutynyň
halkara žurnalistikasy hünäriniň talyby,
«Esger».