BMG-niň Merkezi Aziýa üçin Öňüni alyş diplomatiýasynyň sebit merkeziniň wekili bilen duşuşyk geçirildi
2025-nji ýylyň 27-nji martynda Türkmenistanyň Daşary işler ministrliginiň Halkara gatnaşyklary institutynda Halkara hukugy we deňeşdirme hukuk öwreniş kafedrasynyň guramagynda BMG-niň Merkezi Aziýa üçin Öňüni alyş diplomatiýasynyň sebit merkeziniň wekili Saprykin Filipp bilen bilelikde duşuşyk geçirildi. Bu duşuşyga talyp ýaşlar we mugallymlar gatnaşyp, duşuşygy institutyň Jemgyýeti öwreniş ylymlary kafedrasynyň müdiri, filosofiýa ylymlarynyň kandidaty O.Ezimowa alyp bardy.
Myhman öz çykyşynda BMG-niň Merkezi Aziýa üçin Öňüni alyş diplomatiýasynyň sebit merkeziniň alyp barýan işi dogrusynda, Türkmenistan bilen bilelikde giň möçberli hyzmatdaşlyklaryň netijesinde ýetilen sepgitler barada, şeýle-de 2021-nji ýylyň 16-njy aprelinde Birleşen Milletler Guramasynyň Baş Assambleýasynyň 75-nji sessiýasynyň 59-njy mejlisinde “Birleşen Milletler Guramasynyň Merkezi Aziýa üçin öňüni alyş diplomatiýasy boýunça sebit merkeziniň orny” atly Rezolýusiýasynyň kabul edilmegi hem-de Türkmenistan ýurdumyzyň halkara gatnaşyklarynda alyp barýan hemişelik Bitaraplyk syýasaty we häzirki wagtdaky ýetilen sepgitler boýunça giňişleýin gürrüň berdi.
Parahatçylygyň, ylalaşygyň we halklaryň arasyndaky dostlugyň hakyky merkezine öwrülen Aşgabatda Birleşen Milletler Guramasy we beýleki ençeme abraýly halkara guramalar bilen bilelikde uly forumlaryň we wajyp ähmiýetli duşuşyklaryň geçirilmegi munuň aýdyň subutnamasydyr.
Duşuşygyň soňunda talyp ýaşlar özleriniň gyzyklanýan soraglaryny berdiler. Duşuşyk örän täsirli geçip, talyplarda goşmaça maglumatlary almaga mümkinçilik döretdi.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk
öwreniş kafedrasynyň uly mugallymy.