BMG-NIŇ BOSGUNLARYŇ IŞI BARADAKY ÝOKARY KOMISSARYNYŇ MÜDIRLIGINIŇ GURAMAGYNDA OKUW SAPAGY GEÇIRILDI
2024-nji ýylyň 7-nji noýabrynda Türkmenistanyň Daşary işler ministrliginiň Halkara gatnaşyklary institutynda Birleşen Milletler Guramasynyň Bosgunlaryň işi baradaky Ýokary Komissarynyň Müdirliginiň guramagynda okuw sapagy geçirildi. Oňa BMG-niň Bosgunlaryň işi baradaky Ýokary Komissarynyň Müdirliginiň wekilleri, Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň, Magtymguly adyndaky Türkmen döwlet uniwersitetiniň talyplary gatnaşdylar.
Okuw sapagynyň dowamynda BMG-niň Bosgunlaryň işi baradaky Ýokary Komissarynyň Müdirliginiň Gorag boýunça Ýokary Komissarynyň kömekçisi hanym Ruwendrini Menikdiwela çykyş edip, ikitaraplaýyn hyzmatdaşlygyň mümkinçiliklerini ara alyp maslahatlaşmagyň we raýatsyzlyk meseleleri bilen bagly halkara tejribeleriň möhümdigini belläp, raýatlygy bolmadyk şahslaryň hukuklar bilen üpjün edilmegi ýaly migrasiýa meseleleri boýunça Türkmenistan döwletiniň abraýly guramalar bilen yzygiderli hyzmatdaşlygy alyp barýandygy dogrusynda belläp geçdi.
Ýeri gelende belläp geçsek, bu günki günde ýurdumyz sebitde ilkinjileriň biri bolup bosgunlaryň we raýaty bolmadyk adamlaryň meseleleriniň çözgüdine gönükdirilen halkara tagallalarynyň utgaşdyrylmagyny talap edýän we bu meselelere aýratyn ähmiýet berýän ýurda öwrüldi. Bu babatda Türkmenistan raýatlygy bolmadyk adamlara, migrantlara durmuş goraglylygyny we deň mümkinçilikleri üpjün etmekde kanunçylyk taýdan kadalaşdyrylan netijeli tejribäni görkezýär.
Şeýle okuw sapaklarynyň yzygiderli guralmagy, agzalan ýokary okuw mekdepleriniň talyplarynyň BMG-niň Bosgunlaryň işi baradaky Ýokary Komissarynyň Müdirliginiň alyp barýan işi barada ýakyndan tanyşmagy we bu ugurda hyzmatdaşlygy has hem ösdürmegi üçin giň mümkinçilik döredýär.
Şasenem MEÝLISOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.